Kukësi ishte shumë pranë kualifikimit për në plej ofin e Ligës së Europës, por fati nuk ishte me të. Nënkampionia e Shqipërisë fitoi 2-0 ndaj Torpedos nga Gjeorgjia, duke qenë vetëm një gol larg suksesit.
Mrekullitë në futboll ndodhin dhe shikuesit e paktë në “Elbasan Arena” thuajse e përjetuan një të tillë.
Përfaqësuesi i fundit shqiptar në kupat kontinentale, Kukës, u eleminua pasi iu afrua shumë pranë një suksesi që dukej thuajse i pamundur.
Triumfoi 2-0 ndaj Torpedos së Kutaisit nga Gjeorgjia, në Ligën e Europës, e cila u shpëtua dy herë në fund nga portieri.
Nëse formacioni i trajnerit Cungu do të kishte shënuar edhe golin e tretë, do të ishte kualifikuar për në plej of, pasi takimin e parë në Gjeorgji e kishte humbur me shifrat 2-5.
Cungu kërkoi nga lojtarët e tij që të kërkonin golin sa më shpejt, dhe ata ia dolën që në minutën e 28-të, duke e bërë më të mundshëm kalimin e turit.
Nënkampionët e Shqipërisë luajtën ashtu siç pritej, duke krijuar mjaft raste, e duke qenë gjithnjë pranë portës kundërshtare.
E vetmja anë negative ishte që në “Elbasan Arena” nuk kishte as 1 000 vetë për të shijuar një paraqitje të denjë europiane të ekipit të tyre.
Sulmuesi Rezhinaldo, i ardhur nga Laçi, ishte autor i të dy golave, gjithnjë me penallti, ndërsa sulmuesi gjeorgjan Xharia humbi një mundësi të artë në minutën e 66-të.
Presidenti Gjici besohet do të jetë dëshpëruar nga ky largim, duke mos mundur as këtë vit të synonte kalimin në fazën e grupeve në Ligën e Europës, diçka që në Shqipëri e ka bërë vetëm Skënderbeu.
Gjithsesi, ai ashtu si tifozët, duhet të jetë ndjerë krenar me skuadrën e tij. /abcnews.al
