Schalke 04 ndodhet në vështirësi të mëdha, në aspektin sportiv dhe ekonomik. “Blutë Mbretërorë” renditen në vend të fundit në Bundesligë me vetëm 4 pikë të grumbulluara në 14 javë kampionat, duke mos e njohur akoma shijen e fitores për këtë sezon.
Merkato e janarit shihet si zgjidhja e problemeve, por drejtuesit e klubit kanë nevojë për para për të përforcuar skuadrën. Një ndihmë të madhe në këtë aspekt mund të japë Juventusi. Verën e kaluar, bardhezinjtë arritën akordi me klubin gjerman në lidhje me Weston McKennie.
Kampionët e Italisë paguan 4.5 milion euro për huazimin e mesfushorit amerikan deri në verën e ardhshme, teksa duhet të blejnë lojtarin në fund të sezonit nëse arrihet kualifikimi në Champions League për sezonin 2021/2022.
Sport1.de raporton se drejtuesit e Schalke 04 kanë nisur bisedimet me homologët italianë për të mbyllur shitjen përfundimtare të McKennie që këtë muaj. Klubi gjerman kërkon edhe 18.5 milion euro të tjera për të lënë të lirë përfundimisht “luftëtarin” e mesfushës.
Lojtari i kombëtares së SHBA, është përshtatur shumë mirë në Serie A dhe te Juventusi janë të kënaqur të gjithë me rendimentin e tij. Trajneri Pirlo e vlerëson shumë dhe drejtuesit e “Zonjës” pritet të pranojnë propozimin e ardhur nga Bundesliga. /abcnews.al
