Presidenti i Republikës Ilir Meta ka reaguar pas miratimit të dekretit për zgjerimin 12 milje në detin Jon, nga gjykata supreme greke. Në një postim në llogarinë e tij në Facebook, Meta shkruan se gjatë gjithë kohës ka ofruar bashkëpunimin e tij në këtë proces, duke respektuar vendimin e Gjykatës Kushtetuese.
Kreu i shtetit thotë se deri në këto momente nuk ka marrë asnjë njoftim apo kërkesë zyrtare që të të sugjerojë “ndërprerjen, pezullimin apo përfundimin e procesit të negociatave dypalëshe, nga ekipi negociator apo nga qeveria shqiptare.”
Meta shton se, për çdo zhvillim që lidhet me këtë çështje, ka kërkuar informacion shterues dhe analizë të plotë nga ana e qeverisë shqiptare.
“I rikujtoj edhe një herë përfaqësuesve të institucioneve në të gjithë nivelin hierarkik shtetëror, detyrimin dhe përgjegjësinë për përputhshmërinë e plotë të veprimtarisë së tyre kushtetuese dhe ligjore, në shërbim të interesave shtetërore dhe kombëtare,” thuhet më tej në reagim.
Presidenti thekson gjithashtu se i siguron të gjithë shqiptarët që nuk do të lejojë në asnjë moment që të cenohen interesat shtetërore dhe kombëtare të Republikës së Shqipërisë nga “cilido individ, që keqpërdor autoritetin e deleguar nga populli shqiptar.”
Pasi të vihet në dijeni të plotë të informacioneve të kërkuara zyrtarisht, presidenti shton se do të bëjë transparente vlerësimet dhe qëndrimet e tij në lidhje me zhvillimet rreth kësaj çështjeje.
Kujtojmë se më 25 dhjetor, Këshilli i Lartë i Shtetit në Greqi ka miratuar dekretin për zgjerimin nga 6 deri në 12 milje në detin Jon. Dekreti presidencial është miratuar pasi u paraqit në Gjykatën e Kosacionit nënshkruar nga Kryeministri dhe anëtarët e Këshillit të Ministrave.
REAGIMI
“Duke mirëkuptuar ndjeshmërinë e lartë të opinionit publik shqiptar mbi aktin më të fundit të nxjerrë nga autoritetet më të larta të Republikës së Greqisë dhe pasojat e mundshme të tij ndaj vendit tonë, dëshiroj të evidentoj si vijon:
Në ushtrim të detyrave dhe përgjegjësive të mia dhe në zbatim të vendimit të Gjykatës Kushtetuese Nr.15/2010, kam autorizuar Plotfuqinë për Negocim Nr.733, në emër të Republikës së Shqipërisë, të ekipit negociator me përbërjen e 13 anëtarëve për negocimin e “’Projekt Marrëveshjes ndërmjet Republikës së Shqipërisë dhe Republikës së Greqisë për kufizimin e zonave të tyre detare’, me qëllim saktësimin e Vijës Delimituese të Kufirit Shtetëror Detar dhe delimitimin e Shelfit Kontinental dhe Zonës Ekskluzive Ekonomike midis të dy vendeve””, datë 19.03.2018.
Gjatë gjithë kohës, kam ofruar të gjithë bashkëpunimin në këtë proces, duke siguruar respektimin e vendimit të Gjykatës Kushtetuese.
Deri në këto momente, nuk kam asnjë njoftim apo kërkesë zyrtare, që të sugjerojë ndërprerjen, pezullimin apo përfundimin e procesit të negociatave dypalëshe, nga ekipi negociator apo nga qeveria shqiptare.
Për çdo zhvillim, që lidhet drejtpërdrejt apo ndikon në procesin e negociatave për delimitimin e hapësirës detare ndërmjet dy vendeve, kam kërkuar informacion shterues dhe analizë të plotë të qeverisë shqiptare, sipas përgjegjësive, që i takojnë sipas ligjit.
I rikujtoj edhe një herë përfaqësuesve të institucioneve në të gjithë nivelin hierarkik shtetëror, detyrimin dhe përgjegjësinë për përputhshmërinë e plotë të veprimtarisë së tyre kushtetuese dhe ligjore, në shërbim të interesave shtetërore dhe kombëtare.
I siguroj të gjithë qytetarët shqiptarë se do të vijoj të ushtroj me përgjegjësinë maksimale shtetërore dhe kushtetuese detyrat e mia dhe se nuk do të lejoj për asnjë moment të cenohen interesat shtetërore dhe kombëtare të Republikës së Shqipërisë nga cilido individ, që keqpërdor autoritetin e deleguar nga populli shqiptar.
Sipas traditës së vendosur, pasi të vihet në dijeni të plotë të informacioneve të kërkuara zyrtarisht, do të bëj plotësisht transparent vlerësimet dhe qëndrimet e mia në lidhje me të gjitha zhvillimet ndaj kësaj çështjeje. 
” s.b/abcnews.al/
Mos rri jashtë: bashkohu me ABC News. Ne jemi kudo!
