Juventus luan nesër për Serie A një ndeshje shumë të vështirë ndaj Atalantës së Berat Gjimshitit. Para kësaj ndeshje në konferencë për shtyp doli trajneri i bardhezinjve, Andrea Pirlo.
Italiani foli pak për rivalin e Champions, Porton për raundin e 1/8-ave të Champions League. “Me Porton është duel i vështirë. Kemi respekt për ta dhe do të duhet të përballemi në mënyrën e duhur. Tani, megjithatë, ka kohë për ta menduar, duhet të përqendrohemi në kampionat”.
Më pas Pirlo përqendrohet në sfidën e nesërme. “Kundër Atalantas presim një ndeshje të vështirë, kundër një ekipi shumë të fortë prej disa vitesh tashme. Ata janë një ekip i shkëlqyer jo vetëm në kampionatin italian, por edhe në nivelin evropian.
Do të duhet të përballemi me ta si një ekip i nivelit të lartë. Gasperini u rrit si trajner këtu në sektorin e të rinjve të Juve dhe bëri mirë kudo që shkoi. Ai ka mënyrë shumë të tijën të lojës dhe vazhdon me idetë e tij, të cilat i përshtaten”, u shpreh ish-mesfushori.
Në fund Pirlo foli për problemet e skuadrës së tij, që vjen çdo ditë e më shumë në rritje. “Vazhdimësia vjen vetëm në momentin që ne i trajtojmë të gjitha ndeshjet njëlloj. Kur ke qëndrimin e duhur dhe shpirtin e dëshirës për të luajtur ndeshjen, atëherë rezultatet janë në anën tënde.
Ekipi është rritur në bindje dhe në ndjekjen e rezultatit përmes një qëndrimi agresiv, duke u përpjekur të rimarrë topin shpejt për të pasur më pas menaxhimin e lojës. Duhet të përmirësojmë aspektin teknik, jemi shumë gabim teknikisht gjatë ndeshjes dhe ende duhet të punojmë shumë për këtë.
Është një kampionat i çuditshëm, por si të gjitha kampionatet e tjera evropiane. Duhet të përballeni me çdo ndeshje me mentalitetin e duhur. Nuk ka më ekipe të lehta, ka skuadra të forta që mendojnë të luajnë dhe jo vetëm të mbrohen.
Duhet t’i përballoni të gjitha me një mentalitet të caktuar, përndryshe rrezikon surpriza të pakëndshme”, u shpreh Pirlo. /abcnews.al
