Spektakël dhe emocione dhuruan garuesit e puntatës së mbrëmjes së sotme në “Gladiator”. Skuadra e Guerilëve e përbërë nga Gold Ag, Burak Vehabi dhe Erza Ramuka arriti të triumfojë përballë asaj të Trojanëve me Xhani Demikën, Meriton Ademin dhe Fjorentina Halilin.
Gara e parë, ajo me kuaj shënoi një rezultat të barabartë mes dy skuadrave. Sfida e dytë, rrotullimi i katapultës gjithashtu shënoi një barazim mes tyre në dy raundet e para, por Trojanët hoqën dorë në të tretin duke ua kaluar fitoren e kësaj gare Guerilëve.
Në betejën me shtiza arriti të triumfojë skuadra e Trojanëve, ndërsa në garën e katërt pas shumë sfidash fituan Guerilët. Ndezja e pishtarit që ishte dhe beteja e fundit mes skuadrave i dha automatikisht fitoren Guerilëve pasi triumfuan në dy raunde kundrejt një të Trojanëve. /abcnews.al
