Presidenti Ilir Meta ka vendosur të kthejë në Kuvend projekt-buxhetin për vitin 2021. Drejtori i kabinetit në presidencë, Edmond Panariti ka shpjeguar arsyet e këtij vendimi duke deklaruar se në buxhet nuk parashikohet mbështetje e mjaftueshme për qytetarët dhe sistemin shëndetësor, ndërkohë që projeksionet ndërkombëtare paralajmërojnë rritje infeksionesh me COVID-19.
Panariti u shpreh se buxheti nuk ka plan për mbështetjen e biznesit të vogël të prekur nga pasojat ekonomike të pandemisë dhe rikuperimin e vendeve të humbura të punës. Sipas tij për vitin e ardhshëm parashikohet rritje e pagesës përkundrejt PPP, 1/4 më shumë se një vit më parë.
“Në një kohë kur të gjithë projeksionet e institucioneve ndërkombëtare parashikojnë rritje të numrit të të infektuarve, në buxhet nuk parashikohet mbështetje e mjaftueshme për këto nevoja emergjente. Nuk ka buxhet për trajtim spital ndërkohë që pritet rritja e numrit të pacientëve në spital. Kjo është arsyeja thelbësore për kthimin e projekt buxhetit për vitin e ardhshëm.
Ndërkohë aty nuk parashikohen programe për të mbështetur biznesin e vogël apo për të përballuar pasojat e pandemisë pasi numri i vendit të punës të humbura përllogaritet në 50 mijë. Për vitin e ardhshëm parashikohet rritje e pagesës përkundrejt PPP, 1/4 më shumë se një vit më parë. Kjo nuk është e justifikueshme”, tha Panariti./mv.abcnews.al
