Drejtori sportiv i Milanit, Paolo Maldini, nuk kërkon të heqë dorë nga ëndrra për titullin kampion të Serie A. Kuqezinjtë vazhdojnë të jenë në vendin e parë në renditje dhe ish-mbrojtësi beson se skuadra do të vazhdojë me këtë ritëm. Ai e pranon se nuk e priste një ecuri kaq të mirë, por thekson se ata duhet të paktën të sigurojnë pjesëmarrjen në Champions League në sezonin e ardhshëm.
“Ne nuk jemi në kërkim të statistikave, por të sukseseve. Sinqerisht nuk e prisja një ecuri pozitive kaq të gjatë në kampionat, por i kisha parë shenjat e para që në janar para se bota të ndalej. Objektivi? Minimumi është të bëjmë më mirë se sezonin e kaluar. Ne u kualifikuam në Europa League dhe ideja është të bëjmë më shumë. Do të ishte absurde të mos arrinim një nga vendet që të dërgon në Champions League”, deklaron italiani.
“Milan po ëndërron dhe nuk dëshiron të ndalojë së ëndërruari. Unë gjithmonë kërkoj nga lojtarët të jenë ambiciozë. Duhet të kesh gjithmonë një qëllim për të arritur.
Kundërshtarët? Juve, Inter dhe Napoli do të luftojnë për titullin. Pres një rritje të zikaltërve, por për ne nuk ka asnjë ndryshim. Unë mendoj për rrugën tonë dhe do të vazhdojmë siç kemi bërë deri tani. Injorimi i Europa League? Luftuam aq shumë që të ishim pjesë e saj dhe do të ishte marrëzi të hiqnim dorë tani”, përfundon Maldini. /abcnews.al
