Bayern Munchen shënoi tre herë në portën e Dortmund, siguroi tre pikë pas triumfit 2-3 dhe kryeson i vetëm Bundesligën me 18 pikë, dy më shumë se Leipzig dhe tre sipër kundërshtarëve të sotëm.
Klasikja e futbollit gjerman dhuroi emocione dhe gola të bukur, por në fund festuan djemtë e Hans-Dieter Flick. Marco Reus zhbllokoi shifrat në minutën e fundit të pjesës së parë, teksa Lewandowskit iu anulua një gol për pozicion të parregullt minuta më parë.
Golat dhe rastet e DORTMUND-BAYERN MUNCHEN
Kapiteni i verdhezinjtë mori një asist nga portugezi Guerreiro dhe mposhti Neuer me një goditje të menjëhershme. Festa e ekipit vendas zgjati vetëm 4 minuta, pasi David Alaba barazoi takimin pas një ekzekutimi perfekt nga goditja e dënimit.
Bayerni e mbylli me gol fraksionin e parë të ndeshjes dhe e nisi me një të tillë të dytin. Minuta e 48-të, krosim i Hernandez nga krahu i majtë dhe zhytje fantastike me kokë e Robert Lewandowskit. Miqtë shënuan sërish dhjetë minuta para fundit.
Kundërsulm perfekt dhe finalizim i bukur i Leroy Sane, i cili është përshtatur për mrekulli në ekipin e ri. Dortmundi nuk u dorëzua dhe shkurtoi rezultatin tre minuta më vonë. Erling Haaland nuk mund të rrinte pa shënuar dhe ia doli të dërgoje topin në rrjetë.
Bayern take the three points and pull clear of Dortmund at the top ?#DerKlassiker #BVBFCB pic.twitter.com/kiF0iIfXjO
— Bundesliga English (@Bundesliga_EN) November 7, 2020
Super asist i Guerreiros (i dyti në këtë takim), shkëputje e bukur e bomberit norvegjez, driblim i Neuer dhe topi në rrjetë. Lewa shënoi një tjetër gol në shtesa, por teknologjia VAR ndërhyri sërish dhe anuloi golin e sulmuesit polak.
Përfundimisht 2-3, me Bayerni që ia doli të siguronte triumfin në transfertën më të vështirë të kampionatit, duke konfirmuar se kush komandon në futbollin gjerman, teksa e vetmja gjë negative për bavarezët ishte dëmtimi i Joshua Kimmich, i cili u largua duke çaluar në minutën e 36-të. /abcnews.al
