Juventusi fitoi 1-4 përballë Ferencvaros në transfertë, duke arritur fitoren e dytë ne grupin G. Kapiteni i kampionëve të Italisë, Giorgio Chiellini vlerëson ndeshjen e luajtur në prononcimin e dhënë për Sky Sport.
Lideri i prapavijës së skuadrës së Andres Pirlos, bën thirrje për shokët e tij që të qëndrojnë larg euforisë, teksa fokusohet te sfida me Lazion në kampionat.
“Kjo ndeshje u bë më e thjeshtë edhe për meritën tonë. Luajtëm një takim shumë të mirë, të cilën e nisëm në mënyrën e duhur duke e zhbllokuar shpejt.
Nuk u ndalëm së sulmuari edhe pas golit të Moratës, shfaqëm ekuilibrin e duhur në fushë. Sigurisht që ka një diferencë të madhe mes nesh dhe Ferencvaros.
Nuk duhet të rrëmbehemi nga kjo fitore, por është një sukses që na shton besimin te vetja. Të fokusohemi te Lazio, duam të bëjmë një ndeshje të bukur edhe në Olimpico“, thekson Chiellini. /abcnews.al
