Emilio Butragueno është një legjendë e Real Madrid dhe nuk i ka kursyer elozhet për Zinedine Zidane. Periudha e fundit nuk ka qenë aspak e mirë për “Los Blancos” dhe trajnerin francez.
Dy humbjet radhazi në kampionat dhe Champions League, sollën kritika të shumta dhe në skenë dolën emrat e Pochettinos dhe Raul si zëvendësuesit e Zidane në pankinë.
Gjithsesi, kampionët në fuqi të Spanjës morën një fitore të madhe në El Clasicon e luajtur në “Camp Nou” përballë Barcelonës (1-3) dhe në ekipin kryeqytetas është rikthyer qetësia.
“Zidane është pjesë e futbollit prej shumë vitesh dhe e di fort mirë se kur mungojnë rezultatet pozitive është radha e kritikave. Kemi një skuadër të madhe dhe një trajner të madh.
Duhet ta kalojmë shumë natyralisht këtë situatë. Nuk ka pasur kurrë dyshime rreth Zidane, të gjithë e kanë të qartë se çfarë personifikon ai për Realin.
Askujt nuk i pëlqejnë humbjet, por Zizou duhet të qëndrojë i qetë“, deklaron ish-sulmuesi i famshëm spanjoll. /abcnews.al
