Presidenti i Bullgarisë, Rumen Radev, ndërpreu një udhëtim zyrtar në Estoni, pasi u bë e ditur se, ka qenë i ekspozuar ndaj koronavirusit.
Radev u kthye të martën në Bullgari dhe u fut në karantinë. Ministri bullgar i Shëndetësisë, Kostadin Angelov, tha se Radev, më 16 tetor, ka qenë në kontakt me një zyrtar ushtarak bullgar, i cili ka dalë pozitiv në testin për koronavirus.
Pas arritjes në aeroportin e Sofjes, Radev i hodhi poshtë komentet e bëra në Facebook nga presidenti i Estonisë, Kersti Kaljulaid, se ai dhe delegacioni i tij janë futur në karantinë në një hotel në Talin, raporton REL.
“Përkundër spekulimeve, as unë, as ndonjëri nga delegacioni im, as gazetarët që më shoqëruan, nuk kanë qenë në karantinë në Estoni. Unë jam në formë të shkëlqyeshme”, tha Radev. Radev tha se për herë të fundit ka dalë negativ në testin për koronavirus më 19 tetor./abcnews.al
