Policia ka konfirmuar zyrtarisht gjatë ditës së sotme, gjetjen e dy trupave të pajetë të Vilson Çutaj dhe Klement Pepaj.
Përmes një njoftimi zyrtar, policia ka raportuar se pas marrjes së njoftimit për humbjen e kontakteve të tre të rinjve në Malësinë e Madhe, është vënë në kërkim të tyre duke përdorur edhe dronët.
Sipas policisë, trupat e pajetë të Vilson Çutaj, 37 vjeç dhe Klement Pepaj, 21 vjeç u gjetën në vendin e quajtur “Rrenza e Grecajve” ndërsa nga këqyrja e vendit të ngjarjes, dhe kontrollit përreth vendit ku u gjetën të vrarë dy të rinjtë, u gjetën të kultivuara 29 bimë kanabis.
Njoftohet se grupi hetimor pas marrjes së informacioneve dhe provave të mbledhura, është bërë shpallja në kërkim e Danjel Pepaj, 25 vjeç, banues në fshatin Vrith, Malësi e Madhe, për veprat penale “Vrasja në rrethana cilësuese”, “Armëmbajtja pa leje” dhe “Kultivimi i bimëve narkotike”.
Policia ka nisur bashkëpunimin edhe me homologët e vendeve fqinjë, për të bërë të mundur lokalizimin e vendndodhjes, kapjen dhe arrestimin e autorit të dyshuar.
Sakaq për këtë ngjarje është bërë dhe arrestimi i babait të Danjel Pepaj, Rrok Pepaj pasi ai akuzohet se ka kultivuar 29 bimët e kanabisit që u gjetën pranë vendit ku u ekzekutuan dy të rinjtë.
Njoftimi i Policisë:
Strukturat e Drejtorisë Vendore të Policisë Shkodër, menjëherë pas marrjes së njoftimit për humbjen e kontakteve të tre të rinjve me familjarët e tyre në Malësinë e Madhe, organizuan grupe kontrolli në të gjithë zonën duke përdorur edhe dronë.
Njëkohësisht u ngrit një grup i posaçëm hetimor me specialistët më të mirë të Hetimit të Krimit në DVP Shkodër dhe në Departamentin e Policisë Kriminale në Policinë e Shtetit dhe nën drejtimin e Prokurorisë së Rrethit Gjyqësor Shkodër, vijoi puna për zbardhjen e ngjarjes, pasi dyshohej se të rinjtë mund të ishin vrarë.
Pas kërkimeve intensive në malet e fshatit Vrith, Malësi e Madhe, në vendin e quajtur “Rrenza e Grecajve”, u bë e mundur gjetja e trupave të pajetë të dy të rinjve, Vilson Çutaj, 37 vjeç dhe Klement Pepaj, 21 vjeç.
Nga veprimet e para hetimore rezultoi se këta dy shtetas ishin vrarë me armë zjarri. Gjithashtu, nga këqyrja e vendit të ngjarjes dhe kontrollit përreth vendit të ngjarjes u gjetën të kultivuara 29 bimë kanabis.
Në lidhje me këtë ngjarje u arrestua në flagrancë për veprën penale “Kultivim i bimëve narkotike”, shtetasi Rrok Pepaj, lindur dhe banues në fshatin Vrith, Malësi e Madhe, pasi dyshohet se në bashkëpunim me djalin e tij Danjel Pepaj, 25 vjeç, në fshatin Vrith, Malësi e Madhe janë personat që kanë kultivuar 29 bimët narkotike të gjetura në vendin e ngjarjes.
Në vijim të veprimeve hetimore të kryera nga grupi i posaçëm hetimor për zbardhjen e ngjarjes, si rezultat i provave e informacioneve të grumbulluara dhe veprimeve të shpejta profesionale është bërë shpallja në kërkim e autorit të dyshuar të vrasjes së dy të rinjve, konkretisht e shtetasit Danjel Pepaj, 25 vjeç, banues në fshatin Vrith, Malësi e Madhe, për veprat penale “Vrasja në rrethana cilësuese”, “Armëmbajtja pa leje” dhe “Kultivimi i bimëve narkotike”.
Vijon puna intensive, në bashkëpunim edhe me homologët e vendeve fqinjë, për të bërë të mundur lokalizimin e vendndodhjes, kapjen dhe arrestimin e autorit të dyshuar Danjel Pepaj.
N.D./abcnews.al
