Gazment Brakës, i njohur ndryshe edhe si Gaxhai, i është kapur një telefon në qeli gjatë kontrolleve të ushtruara nga punonjësit e policisë, në burgun e sigurisë së lartë në Peqin, ku ai vuan dënimit.
Abcnews.al mëson se celulari, një “Samsung”, Galaxy J3″, Gaxhait i është gjetur nga dy punonjës policie mbrëmjen e 1 marsit në vitin 2018.
Në orën 22.00, gjatë kontrolleve të kryera në dhomën Nr.7 ku vuan dënimin Gaxhai, punonjësit e policisë, Fatmir Pupa, Arbër Labi, gjetën celularin Samsung, me ngjyrë të zezë, me një kartë SIM, të bardhë, pa emër.
Në dëshminë e dhënë, Gaxhai ka pranuar se celulari është i tiji duke shtuar se e kishte pasur prej rreth një muaji.
Në cilësinë e provës u mor raporti i shërbimit mbrëmjen e 1 marsit, i përpiluar nga punonjësi i policisë Labi. Ndërsa, celulari Samsung është këqyrur dhe sekuestruar nga policia gjyqësore.
Kështu, në përfundim të hetimit të nisur më datën 6 mars të vitit 2018, prokuroria pranë Gjykatës së Shkallës së Parë Elbasan ka regjistruar Procedimin penal për Gaxhain, për veprën penale “Futja ose mbajtja e sendeve to ndaluara në institucionin e ekzekutimit të vendimeve me burgim”.
Kujtojmë se Gazment Braka ose Gaxhai është i dënuar përjetë për vrasje dhe për krijim organizate kriminale në vitin 1997.
Historia e bandës dhe përplasjet me Zani Çaushin
Çfarë ndodhi në maj 1997, kërkoi blindat te drejtuesit e Policisë.
Gazmend Braka, së bashku me një grup shokësh nga qyteti i Vlorës, por dhe nga qytete të tjera, ndër ta dhe mjaft persona tashmë të vrarë, krijuan bandën që më pas do të njihej si banda e “Gaxhait”.
Në funksion të organizimit të kësaj bande të armatosur, shërbejnë dhe faktet që duke pasur si qendër fshatin Cerkovinë, anëtarët e bandës nuk kryenin asnjëherë veprimtari kriminale në atë fshat.
Nga deklarimet e banorëve të fshatit, rezulton se Gaxhai së bashku me pjesëtarët e tjerë të grupit, për të krijuar idenë e një grupi të organizuar që mbronte zonën herë pas here, ndihmonte me para njerëzit e fshatit. Gjithashtu, provohet se mjaft shtetas që kishin konflikte me persona të ndryshëm në Vlorë shkonin te Gaxhai në Cerkovinë për t’ua zgjidhur problemet e tyre.
SULMI NDAJ KOMISARIATIT TË VLORËS
Më datë 11.05.1997, anëtarët e bandës “Gaxhai”, të organizuar kanë shkuar në Komisariatin e Policisë Vlorë për të marrë një mjet të blinduar dhe para se të largoheshin kanë vrarë oficerin e Policisë, shtetasin Viron Rrapaj.
Lidhur me këtë ngjarje, gjatë këtij hetimi gjyqësor prokurori arriti të provojë se nga ana e Policisë kishte të dhëna se bandat që vepronin në qytet do të sulmonin komisariatin e Policisë, për të marrë prej aty mjetet e blinduara.
Në fillim, rreth orës 11:00 të datës 11.05.1997, në komisariat kanë shkuar tre-katër persona të armatosur dhe kanë hyrë në fillim tek oficeri i rojës.
Aty njëri prej tyre është prezantuar si Gaxhai dhe ka kërkuar që të merrte kontakt me drejtuesit e Policisë dhe ka kërkuar të merrte blindat për t’u mbrojtur nga Zani. Pas disa minutash, para komisariatit të Policisë erdhën mjaft makina dhe prej tyre zbritën rreth 30- 40 persona të armatosur, të cilët u futën në oborrin e komisariatit. Siç rezultoi edhe nga dëshmitë e dhëna para Gjykatës nga ana e punonjësve të Policisë, të cilët ishin prezentë në ato momente, pjesëtarët e organizatës kriminale kontaktuan me oficerin e Policisë, Haxhi Demirin, i cili u shpjegoi se nuk mund t’i merrnin mjetet e Policisë. Pasi u sqaruan, personat e armatosur u tërhoqën prej komisariatit.
Duke dalë nga oborri i komisariatit, Alfred Nebiu (Kakami) ka parë policin Viron Rrapaj në derën e brendshme të komisariatit dhe ka qëlluar në drejtim të tij, duke e vrarë.
Përveç Alfredit, deklaruesi Ilirjan Beqiri, por dhe persona të tjerë që kanë qenë aty të pranishëm, kanë mundur të njohin nga anëtarët e bandës, të pandehurin Gazmir Braka (Gaxhain), Sokol Sinomatin dhe Armando Sulejmanin, i cili kur u zhvillua ngjarja ka pasur një debat me policin Andrea Kanani (vdekur) për t’i marrë antiplumbin.
“Unë kam dëgjuar që këtë vrasje e ka kryer banda e ‘Kakamit’ dhe personat që kanë kryer vrasjen ishin Alfred Nebiu ‘Kakami’, Gazmend Braka ‘Gaxhai’ dhe Ilir Kokosi. Di që ditën e vrasjes, burri im, Vironi, kishte shërbimin dhe po atë ditë kishin shkuar në komisariat për të marrë autoblinda dhe pasi kishin marrë përgjigje negative, ata (banda) kanë qëlluar Vironin, i cili ka qenë pak metra para tyre dhe po shkonte të hynte në komisariat”, ka dëshmuar gruaja e policit të vrarë, Teuta Rabaj. s.b/abcnews.al/
