Aston Martin DB5 është një makinë që famën e saj e ka të ndërthurur me atë të super spiunit britanik James Bond. Tashmë, DB5 do të vijë si një makinë krejtësisht e re 55 vite më vonë pas prezantimit të saj për herë të parë. Makina vjen me një çmim prej 3.5 milion dollarësh.
E ndërtuar në bashkëpunim me prodhuesit e filmave Bond EON Productions, makina e re përmban një përzgjedhje të pajisjeve të njohura nga filmi klasik i James Bond, Goldfinger, dhe disa prej tyre funksionojnë me të vërtetë, shkruan abcnews.al.
Këto karakteristika përfshijnë një sistem të simuluar të shpërndarjes së vajit apo mburojë e pasme rezistente ndaj plumbave. DB5 ka një motor me gjashtë cilindra 4.0 litërsh dhe që arrin deri në 290 kuajfuqi. Motori është i bashkuar me një transmision manual ZF me pesë shpejtësi që dërgon fuqinë në rrotat e pasme.
Marek Reichman, drejtuesi i zyrës së dizajnit në Aston Martin Lagonda tha se: “DB5 është pa diskutim makina më e famshme në botë për shkak të bashkëpunimit 50 vjeçar me James Bond. Kjo është DB5 e parë e re që kemi ndërtuar në më shumë se gjysmë shekulli, me të vërtetë është një privilegj dhe përgjegjësi, të përfshihesh në krijimin e këtij modeli të ri.” xh.d/abcnews.al
