Nga Erblina Mile
Mbi 1500 qytetarë nuk kanë arritur që të përfitojnë ende pagën e luftës nga mbi 120 mijë që e përfitojnë në total. Drejtorja e Tatimeve Delina Ibrahimaj deklaron se ngërçi ka ardhur si pasojë e plotësimit gabim të llogarive bankare. Në një intervistë për ABC News ajo thekson se këta individë kanë afat deri në 25 shtator për të rishikuar të dhënat ose do të humbasin të drejtën për të përfituar mbështetjen financiare.
“Në këtë moment nga 2700 që ishin në fund të gushtit, ne kemi 1300 llogari bankare të pasaktësuar për paketën e 2 dhe 256 llogari për paketën e parë. Ky proces do të përmbyllet në 25 shtator pasi ne para se të mbarojë viti duhet të bëjmë rakordimet dhe kthimin e fondeve të betuara në Ministrinë e Financave”, u shpreh ajo.
Qershori është muaji më problematik pasi ka numrin më të lartë të larguarve nga puna. Sipas drejtores së tatimeve, bizneset e mëdha kanë hequr më shumë të punësuar në krahasim me bizneset e vogla.
“Megjithatë është për tu theksuar se 14 mijë e 493 është një shifër që kryesisht i dedikohet biznesit të madh, pra aty ku ka rënë më shumë punësimi është biznesi i madh. Biznesi i vogël në qershor të 2020 në krahasim me shkurtin e 2020 ka pasur rritje të punësuarve me rreth 2 mijë persona”, tha më tej ajo.
Korriku ka numrin më të lartë të subjekteve që kanë kaluar në statusin pasiv. Drejtorja e Tatimeve thotë se pandemia ka ndikuar te subjektet që kanë shpallur këtë status, por ky është një proces dinamik që ndryshon shpejt.
“Nuk është një situatë e krijuar në shkurt mars apo prill, natyrisht që pandemia ka mbyllur biznese, por nuk janë shifrat e kalimit të bizneseve në pasiv, kjo nuk tregon fiks dinamikën e çeljeve apo mbylljes së bizneseve”.
Sektori i ndërtimit dhe tregtia rezultojnë me nivelet më të larta të informalitetit. Drejtorja e Tatimeve deklaroi se këto sektorë do të jenë në fokus të kontrolleve.
“Mbi 70 % të ardhurave vijnë nga 1200 tatimpagues dhe ne jemi përqendruar në ato tatimpagues në fushën e ndërtimit, sidomos ku nga analizat tona, informaliteti qëndron në nivele mjaft të larta”, tha ajo.
Gjatë vitit të ardhshëm në vend do të nisë edhe zbatimi i procesit të fiskalizimit i cili pritet të ndikojë në uljen e informalitetit në vend. Në janar të 2021 faturat e para online parashikohen të jenë ato midis shtetit dhe biznesit për tu shtrirë më pas edhe biznes-biznes si dhe biznes-konsumator.
/abcnews.al/
