Kryeministri i Kosovës, Avdullah Hoti ka kërkuar që të raportojë në Kuvend pas nënshkrimit të marrëveshjes në Shtëpinë e Bardhë.
Lajmin e ka bërë të ditur qeveria me anë të një njoftimi për shtyp.
“Kryeministri i Qeverisë së Republikës së Kosovës, Avdullah Hoti ka kërkuar t’i mundësohet që, në njërën nga seancat e ardhshme, të raportojë në Kuvendin e Republikës së Kosovës për Marrëveshjen e normalizimit të marrëdhënieve ekonomike në mes të Kosovës dhe Serbisë, të nënshkruar në Shtëpinë e Bardhë,” thuhet në njoftim.
Po ashtu, është publikuar edhe letra që Hoti i ka nisur për kryeparlamentaresVjosa Osmani dhe anëtarëve të kryesisë.
Në letër thuhet se në Shtëpinë e Bardhë, është arritur një Marrëveshje e rëndësishme për vendin lidhur me normalizimin e marrëdhënieve ekonomike mes të Kosovës dhe Serbisë.
“ Ky është hap shumë i rëndësishëm drejt marrëveshjes përfundimtare për normalizim të plotë të marrëdhënieve dhe njohje reciproke në mes të dy shteteve. Në bazë të kompetencave dhe përgjegjësive të mia kushtetuese e ligjore, jam i gatshëm që në njërën nga seancat e radhës të Kuvendit të Republikës së Kosovës të raportoj para deputetëve për marrëveshjen në fjalë, si dhe për procesin e dialogut në përgjithësi.” s.b /abcnews.al/
