Skuadra e Milanit po vazhdon përgatitjet për ndeshjen e play-off të Europa League, ku kuqezinjtë do të përballen me Shamrock Rovers në Irlandë. Tekniku Stefano Pioli pas fitores në miqësoren kundër Monzës u shpreh se ata do të kenë disa mungesa në mbrojtje, si dhe vlerëson kundërshtarin.
“Lojtarët morën disa minuta shumë të vlefshme, të cilat na bëjnë shumë mirë përpara ndeshjes në Europa League. Nuk kemi dëmtime dhe me shumë mundësi unë do ta kem gati të gjithë ekipin vetëm pak ditë përpara ndeshjes.
Ne do të jemi kundër një ekipi që është më në formë se ne, pasi ato kanë disa javë që e kanë filluar sezonin. Do të kemi disa mungesa në mbrojtje, ku Romagnoli, Musacchio dhe Conti janë të dëmtuar.
Jam në kontakte të vazhdueshme me klubin dhe drejtorët nëse do të duhet ndonjë ndërhyrje urgjente në merkato. Bakayoko? Nuk jam personi i duhur për këtë pyetje. Unë mund të flas vetëm për lojtarët që kam në dispozicion. /abcnews.al
