PSG ia doli të fitonte dhe Kupën e Ligës. Skuadra e Thomas Tuchel nuk e pati aspak të lehtë kundër Lyon, por i buzëqeshi fati i penalltive dhe siguroi një tjetër trofe pas kampionatit dhe Kupës së Francës.
Tani është radha e Champions League, trofe që klubi kryeqytetas s’e ka fituar kurrë. 12 gushti i vë përballë Atalantës në çerekfinale, sfidë që do të luhet në Estadio da Luz të Lisbonës. Tuchel thur elozhe për ekipin nga Bergamo, teksa flet edhe rreth Kylian Mbappe.
Ylli i ekipit pësoi një dëmtim në finalen e Kupës së Francës të fituar ndaj St Etienne dhe prania e tij në duelin ndaj Djimsitit me shokë do të jetë tepër e vështirë.
“Nuk njoh asnjë skuadër që luan si Atalanta. Kanë një stil të veçantë, si në fazën mbrojtëse dhe sulmuese. Ne duhet të përqendrohemi shumë te gjendja shpirtërore, shpirti luftarak i skuadrës dhe dëshira për të fituar.
Mbappe? Akoma shpresoj që mund të rikuperohet për sfidën çerekfinale kundër ekipit italian, edhe pse mundësitë janë të vogla. Kylian po kurohet, por më duhet ta pranoj se vetëm një mrekulli do e rikthejë në fushë kundër Atalantës“, deklaron trajneri gjerman. /abcnews.al
