Juventusi e ka nisur shumë mirë ndeshjen jashtë fushe kundër Sassuolos. Vendasit, të cilët po kalojnë një moment shumë të mirë dhe ëndërrojnë kualifikimin në Europa League, kanë rezistuar vetëm pesë minuta.
Miralem Pjanic dhe Danilo kishin menduar një skemë dhe ia dolën ta realizonin në perfeksion. Boshnjaku pasoi nga goditja e këndit dhe braziliani lëshoi një goditje fantastike me të djathtën.
Topi në rrjetë dhe goli i dytë në Serie A për mbrojtësin 29-vjeçar. Shtatë minuta më vonë erdhi edhe goli i dytë. Pjanic dhuroi një tjetër asist dhe Gonzalo Higuain nuk gaboi përpara portës kundërshtare, duke i dhuruar avantazhin e dyfishtë bardhezinjve. /abcnews.al
