Qeveria shqiptare ka miratuar në mbledhjen e djeshme të Këshillit të Ministrave garancinë e dytë sovrane me vlerë 15 miliardë lekë.
Ministrja e Ekonomisë Anila Denaj ka njoftuar se garancia sovrane do të ofrojë mundësi financiare për të gjitha sipërmarrjet e ndikuara në aktivitet nga pandemia dhe historik të marrëdhënies kreditore.
Nga këto kredi që biznesi do të marrë, Denaj thotë se qeveria del garant për 60 % të çdo huaje që bankat do të japin, ndërsa 40 % tjetër do të dalë garant vetë sipërmarrja.
Kjo paketë do të ofrojë kredi me një afat shlyerjeje deri 5 vjet, me hapësirë për të mos paguar principalin deri në 6 muaj.
“15 miliardë lekë mbështetje nga Qeveria Shqiptare për Garancinë Sovrane 2
Garancia Sovrane II, ofron mundësi financimi për të gjitha sipërmarrjet e ndikuara në aktivitet nga situata e pandemisë dhe me një historik pozitiv të marrëdhënies kreditore.
Qeveria shqiptare garanton 60% të principalit të çdo huaje, që bankat do të lëvrojnë për biznesin, sipas eksperiencave më të mira ndërkombëtare. Ky instrument:
-Është në dispozicion për sipërmarrësit në të gjithë sektorët e ekonomisë
-Synon të jetë burim për kreditimin e kompanive për kapital qarkullues dhe investime
-Ofron mundësi financimi me një afat shlyerjeje deri 5 vjet
-Ofron hapësirën për të mos paguar principalin për një periudhë jo më pak se 6 muaj
-Ftojmë të gjitha bizneset, të mobilizojnë fondet e nevojshme për kapërcimin e efekteve të pandemisë dhe për të hedhur hapat drejt rimëkëmbjes së aktivitetit dhe ekonomisë.
-Prej javës së ardhme bizneset mund të shprehin interesin pranë të gjitha bankave të nivelit të dytë”, njofton Denaj./abcnews.al
