E ardhmja e portierit të Milanit, Gianluigi Donnarumma, duket se do të jetë në Milano. Edhe pse ka disa kohë që gardiani është në orbitën e PSG-së, drejtuesit kuqezinj po mundohen të bëjnë të pamundurën për të mos e lëshuar atë.
Italiani është në kontratë me Milanin deri në qershor të vitit 2021 dhe paga e tij aktuale është 6 milionë euro. Sipas “La Gazzetta dello Sport”, plani i Elliott është t’i ofrojë një kontratë të re Gigios, pasi ata e konsiderojnë atë si një nga shtyllat e ekipit.
Ata pritet t’i ofrojnë Donnarummës një kontratë të re që përfundon në vitin 2022, por me një ulje të pagës që shkon deri në 5 milionë euro. Por, në kontratë do të përfshihet një bonus në rast kualifikimi të Milanit në Champions League. Megjithatë më shumë do të mësojmë në javët në vazhdim, ku do të vendoset dhe e ardhmja e gardianit të kombëtares italiane. /abcnews.al
