Kriza në botën e futbollit nga Coronavirusi vazhdon. Ende nuk ka një datë se kur do të rikthehet futbolli i luajtur, ndërkohë që dëmi financiar është bërë tashmë. Shoqata e Klubeve Europiane ka hartuar një plan për sa i përket merkatos së verës.
Shoqata që drejtohet nga presidenti i Juventusit, Andrea Agnelli, kërkon që të shtyhen datat e hapjes dhe mbylljes së merkatos. “Modeli i biznesit të shumë klubeve europiane varet pikërisht te merkato. Prandaj do të bëjmë çmos që data e saj të shtyhet”, shkruhet në letër, siç raporton “Corriere dello Sport”.
“Klubet do të kenë mundësinë të përdorin merkaton, jo vetëm për të plotësuar skuadrat, por edhe për bërë para nga operacionet që do kryejnë”, vazhdon letra. Gjithashtu në gazetë raportohet se merkato do të jetë po 16 javë, vetëm pritet të ndryshohet data e fillimit dhe e mbarimit. /abcnews.al
