Christian Vieri mban pozicion për atë që ndodh te Milani. Në kampin kuqezi është krijuar një atmosferë shumë e keqe, për shkak se Boban dhe Maldini nuk kanë një raport të mirë me Ivan Gazidis. CEO i kuqezinjve po tenton të emërojë si trajner gjermanin Ralf Ragnick.
Para pak ditësh Boban kërkoi takim me drejtuesit, pikërisht për këto lëvizje që ish-zyrtari i Arsenalit po bën së fundmi. Një koment në lidhje me këtë e bën edhe ish-sulmuesi, i cili ka veshur edhe fanellën e kuqezinjve në të shkuarën. Ai ka folur në emisionin “Tiki Taka” në Mediaset.
“Gazidis ka bërë një gjest prej frikacaku. Boban nuk është një kukull. Ai ka personalitet dhe t’i thotë gjerat në fytyrë. I tha gjërat që kishte për të thënë. Burrat e vërtetë nuk i bëjnë gjërat pas shpine, sepse kanë këllqe. Boban i ka dhe e tregoi. Për mendimin tim, bëri mirë që bëri këtë zgjedhje.
Me çfarë autoriteti shkon Gazidis të flasë me një trajneri tjetër? Çfarë je duke bërë Gazidis?! Ai duhet të shikojë llogaritë, jo pjesën e futbollit. Ai nuk duhet ta hapë gojën për çështje teknike, sepse janë Maldini dhe Boban për këtë. Kush është ky Gazidis, çfarë bën?”, tha mes të tjerash Vieri. /abcnews.al
