Java nisi me paqe në derbin e ekipeve B, ndërkohë që nesër prej orës 14:00 luhet një tjetër përballje mes Tiranës dhe Partizanit. Ekipet e 17-vjeçarëve luajnë për trofeun e Kupës së Shqipërisë dhe ndeshja zhvillohet në stadiumin “Selman Stërmasi”.
Bardheblutë e drejtuar nga Migen Memelli shikohen si favoritë. Në kampionat renditen në vendin e parë në grupin A, kurse “demat e kuq” pozicionohet të tetët. Gjithsesi është derbi dhe finale, ndaj duhet pritur që gjithçka të vendoset në fushën e blertë.
Edhe pse një ndeshje moshash, tifozët që do të duan ta ndjekin këtë përballje nga stadiumi do të duhet të blejnë bileta. Për ta parë në tribunën kryesore një biletë kushton 200 lekë, kurse në tribunat e tjera 100 lekë. FSHF zbulon edhe pikat e shitjes së biletave, në njoftimin e bërë përmes faqes zyrtare në “Facebook”. /abcnews.al
