Milani mundi mbrëmë Torinon dhe vendimtar me golin e tij ishte Ante Rebic. Kuqezinjtë mirën tre pikë me vlera dhe tanimë mendohet për përballjen me Fiorentinën. Stefano Pioli, direkt pas ndeshjes së djeshme, për “SKY SPORT” analizoi takimin e fituar.
“E mira e kësaj nate është fitorja, por edhe rezultati. Po gjejmë një identitet. Rrezikuam shumë pak. Tani do të shkoj në shtëpi dhe të shoh Sampdoria-Fiorentina. Jam shumë i kënaqur me paraqitjen, pas një javë jo të qetë që kaluam. Mora përgjigje të mira nga ekipi”, tha Pioli.
Më tej ai komentoi edhe nervat e sulmuesit suedez: “Ibrahimovic u zemërua sepse ne mund të luajmë më mirë dhe mund ta kishim mbyllur ndeshjen më herët. Është e drejtë që ai të jetë ambicioz për rritjen tonë, pasi ne i kemi mundësitë për të bërë më mirë. Duhet t’i shohim gjëra pozitivisht”.
Kjaer pësoi një dëmtim dje dhe mendohet se nuk ka diçka serioze. Musacchio doli në nxehje, por nuk u aktivizua. Pioli tregoi edhe pse nuk ndodhi diçka e tillë, ndërkohë që foli edhe për të riun Gabbia, të cilit i besoi më pas.
“Musacchio më tha që kishte një problem muskulor gjatë nxehjes. Gabbia? Jam i kënaqur me të, ka punuar me devotshmëri gjithë kohën. Është i ri, por një djalë që mund t’i besosh. Ka hyrë në fushë me kurajo dhe i bindur. E meriton këtë kënaqësi. Kur punon shumë, puna të shpërblehet”.
Në fund ai foli edhe për emra të tjera të përveçëm: “Paqueta mendoj se mund të bëhet një lojtar i shkëlqyeshëm, i ka të gjitha cilësitë për diçka të tillë. Nuk është akoma i pjekur plotësisht, por të mos harrojmë që është pjesë e kombëtares së Brazilit. Trekuartist? Është roli i Calhanoglu dhe më pëlqen shumë aty. Punon shumë dhe mund të shënojë. Mund ta bëjnë mirë atë pozicion edhe Paqueta e Bonaventura”. /abcnews.al
