Loading ...
Sekretari i Thesarit të SHBA-së, Scott Bessent, është larguar nga banesa e tij dhe është zhvendosur në një bazë ushtarake, pas kërcënimeve të dyshuara nga Irani ndaj jetës së tij. Lajmi është raportuar nga gazeta amerikane “The New York Times”.
Sipas raportimit, autoritetet amerikane kanë shtuar masat e sigurisë ndaj zyrtarëve të lartë të administratës Trump, për shkak të shqetësimeve se Irani mund të ndërmarrë sulme ndaj personelit ushtarak dhe përfaqësuesve të qeverisë amerikane.
Një dokument i brendshëm i administratës amerikane, i siguruar nga Reuters në tetor, paralajmëronte se përpjekjet e Teheranit për të goditur objektiva amerikane kishin arritur në faza të avancuara.
Megjithatë, sipas “New York Times”, mbetet e paqartë se sa serioz është konkretisht kërcënimi ndaj Bessent. Raporti thekson gjithashtu se administrata Trump vlerëson se aftësitë e Iranit për të organizuar sulme në shkallë të gjerë në territorin amerikan apo në vende të tjera janë të kufizuara.
Nga ana tjetër, Teherani ka mohuar vazhdimisht se synon të sulmojë zyrtarë apo qytetarë në territorin amerikan. Departamenti i Thesarit nuk ka dhënë ende një reagim zyrtar lidhur me raportimin.
Scott Bessent është një nga figurat kryesore të strategjisë ekonomike të administratës Trump kundër Iranit, duke drejtuar fushatën e ashtuquajtur të “presionit maksimal”, përmes sanksioneve dhe masave financiare ndaj Republikës Islamike.
Zhvillimet vijnë në një kohë kur konflikti SHBA-Izrael kundër Iranit, i nisur më 28 shkurt, ka shkaktuar përshkallëzim të situatës në Lindjen e Mesme. Bombardimet në Iran dhe sulmet izraelite në Liban kanë shkaktuar mijëra viktima dhe kanë detyruar miliona njerëz të largohen nga banesat e tyre.
