Loading ...
Një aksident i rëndë ajror ka ndodhur të dielën në Florida të SHBA-së, ku një avion privat është rrëzuar në një zonë të banuar, duke u marrë jetën të nëntë personave që ndodheshin në bord. Fatmirësisht, nga përplasja nuk raportohet për viktima apo të lënduar mes banorëve të zonës.
Avioni i tipit Learjet 60 ishte nisur nga Austin, Teksas, dhe kishte si destinacion Bahamasin. Ai u rrëzua pranë zonës Cresthaven, rreth 14 kilometra larg rezidencës Mar-a-Lago të presidentit Donald Trump, në Palm Beach County.
Pamjet nga vendngjarja tregojnë përmasat e mëdha të aksidentit. Në mes të një rruge me gjashtë korsi është krijuar një krater i madh, ndërsa mbetjet e avionit dhe flakët janë shpërndarë në të gjithë zonën.
Sipas të dhënave të publikuara nga autoritetet, avioni kishte nisur të humbiste lartësi me shpejtësi shumë të madhe pak çaste përpara përplasjes. Në komunikimet mes ekuipazhit dhe kontrollit të trafikut ajror dëgjohen sinjale shqetësuese nga kabina. Pilotët raportuan turbulenca, probleme me akullin dhe reshjet, ndërsa kërkuan të ngjiteshin në një lartësi më të madhe.
Situata u përkeqësua me shpejtësi. Një pjesëtar i ekuipazhit shpalli gjendjen e emergjencës, duke njoftuar se avioni po zbriste me shpejtësi rreth 20 mijë këmbë në minutë. “Do të përplasem me tokën”, dëgjohet të thotë ai, ndërsa fjalët e fundit nga kabina ishin: “Nuk na ka mbetur më kohë”.
Pamje të publikuara në rrjetet sociale, të cilat ende nuk janë verifikuar zyrtarisht, duket se tregojnë momentin e aksidentit. Në video, avioni shihet duke rënë pothuajse vertikalisht në tokë, përpara se të shpërthejë në flakë.
Guvernatori i Floridës, Ron DeSantis, e cilësoi ngjarjen si tronditëse, duke thënë se pamjet e aksidentit tregojnë një avion që bie si raketë dhe shkakton një shpërthim të fuqishëm.
Ndërkohë, autoritetet kanë nisur hetimet për të zbardhur shkaqet e tragjedisë. Sekretari amerikan i Transportit, Sean Duffy, e përshkroi ngjarjen si një tragjedi të rëndë dhe bëri të ditur se Administrata Federale e Aviacionit (FAA) do të dërgojë një ekip në vendngjarje për të ndihmuar hetuesit e Bordit Kombëtar të Sigurisë së Transportit.
Për shkak të dëmeve të shkaktuara nga përplasja, rreth 600 banorë të një komuniteti pranë vendit të aksidentit janë evakuuar. Autoritetet bëjnë me dije se shpërthimi ka dëmtuar edhe infrastrukturën lokale, përfshirë tubacionet e ujit, ndërsa rruga ku ndodhi aksidenti pritet të qëndrojë e mbyllur për të paktën 30 ditë.
Në momentin e rrëzimit, në zonë kishte stuhi me bubullima dhe reshje të dendura shiu. Deri tani nuk është bërë e ditur identiteti i nëntë personave që humbën jetën në këtë aksident.
Presidenti Donald Trump ndodhej në rezidencën e tij Mar-a-Lago gjatë mëngjesit të së dielës, por ishte larguar me avionin presidencial Air Force One nga një aeroport aty pranë rreth një orë përpara rrëzimit.
