Loading ...
Djegia e flamurit të Vatikanit, dy ditë më parë gjatë protestës në Tiranë, ka sjellë reagimin e Konferencës Ipeshkvore të Shqipërisë, e cila dënon incidentin e ndodhur pranë Nunciaturës Apostolike, përfaqësisë së Selisë së Shenjtë në Shqipëri.
Sipas KISH, protestuesit kanë hequr flamurin e Vatikanit dhe më pas duket se e kanë djegur, së bashku me objekte të tjera. Në deklaratën e saj, Konferenca Ipeshkvore e cilëson këtë veprim të papranueshëm, duke theksuar se është cenuar simboli i Selisë së Shenjtë dhe është krijuar pasiguri për stafin e Nunciaturës.
“Ky gjest është tërësisht i papranueshëm. Është cenuar simboli i Selisë së Shenjtë e mund të cenohej edhe territori i Nunciaturës duke krijuar pasiguri te stafi i Ambasadës. Kjo shkon kundër ligjit, por edhe kundër virtytit të mikpritjes që shqiptarët kanë për mikun.”
KISH u bën thirrje institucioneve që të tregohen më të kujdesshme dhe të marrin masa paraprake për mbrojtjen e përfaqësive diplomatike, përfshirë edhe përfaqësinë e Selisë së Shenjtë.
Në reagim dënohet dhuna nga çdo anë, qoftë nga protestuesit apo institucionet shtetërore, kur ajo cenon jetën dhe shëndetin e qytetarëve. Në përfundim, Konferenca Ipeshkvore bën thirrje për qetësi, paqe e dialog, duke uruar që incidente të tilla të mos përsëriten
