Loading ...
Estonia po zhvendos një nga brigadat kryesore të ushtrisë së saj nga qyteti i Tapa-s drejt Jõhvi-t, rreth 50 kilometra nga kufiri me Rusinë, ndërsa vendi po përgatitet për një skenar të mundshëm agresioni nga Moska.
Sipas Financial Times, zyrtarët estonezë thonë se vendi po afron vazhdimisht trupat drejt kufirit dhe po siguron armë me rreze të gjatë veprimi, të afta për të goditur objektiva thellë brenda territorit rus.
Megjithatë, drejtuesit e ushtrisë dhe inteligjencës estoneze nuk besojnë se Rusia synon një luftë të plotë me NATO-n, të paktën gjatë dy viteve të ardhshme. Ata paralajmërojnë se Moska po përgatitet për një konflikt të mundshëm me Estoninë në të ardhmen.
Në këtë kuadër, Estonia, e cila nuk ka forca ajrore të veta, ka kaluar drejt një strategjie të quajtur “mbrojtje aktive”, transmeton Telegrafi.
“Duhet të nisim nga kufiri dhe të fitojmë që në betejat e para”, tha koloneli Tarmo Kundla, komandant i Brigadës së Parë Estoneze, njësia kryesore luftarake e vendit.
Brigada e tij po zhvendoset në mënyrë të përhershme nga Tapa në Jõhvi, ku po ndërtohen objekte të reja për akomodimin e trupave.
“Parandalimi nuk po funksionon. Periudha kritike për ta ndryshuar këtë, për të gjithë ne në shtetet baltike, është një deri në katër vitet e ardhshme”, tha një përfaqësues i inteligjencës ushtarake estoneze.
Ministria e Mbrojtjes e Estonisë thekson se synimi është që çdo agresion ndaj vendit të bëhet “i paimagjinueshëm”.
“Qëllimi ynë është i qartë: ta mbajmë armikun dhe shkatërrimin e luftës larg territorit estonez”, deklaroi ministria.
Në maj, qeveria estoneze përfshiu zyrtarisht konceptin e “mbrojtjes aktive” në dokumentin e saj të sigurisë kombëtare. Që atëherë, ushtria ka nisur një riorganizim të rëndësishëm, duke zhvendosur njësi elitare nga Tapa drejt zonave më pranë kufirit rus.
Paralelisht, në qytetin kufitar të Narvës po ndërtohet një bazë e re ushtarake që do të mund të strehojë rreth 1,000 ushtarë.
Estonia ka rritur gjithashtu ndjeshëm kapacitetet e saj për goditje me rreze të gjatë. Gjatë vitit të fundit, vendi ka nënshkruar kontrata për blerjen e nëntë sistemeve amerikane HIMARS, raketave balistike M57 me rreze deri në 300 kilometra, si dhe nëntë sistemeve koreano-jugore Chunmoo MLRS, me rreze të ngjashme. Nga bazat estoneze pranë kufirit, distanca deri në Shën Petersburg është rreth 260 kilometra.
Pas pushtimit rus të Ukrainës në vitin 2014, strategët ushtarakë estonezë kishin ndërtuar një doktrinë të bazuar në historinë dhe pozitën gjeografike të vendit.
Në rast sulmi, ushtarët rezervistë do të mobilizoheshin me shpejtësi dhe do të zhvillonin një mbrojtje taktike, pjesërisht guerile, me synimin për të ngadalësuar forcat ruse dhe për t’i shkaktuar humbje deri në mbërritjen e përforcimeve të NATO-s.
Por, pasi vëzhguan luftën në Ukrainë, drejtuesit ushtarakë estonezë arritën në përfundimin se kjo strategji nuk do të ishte e mjaftueshme. Sipas tyre, Rusia është e gatshme të përballojë humbje të mëdha njerëzore për të mbajtur territoret e pushtuara, edhe kur ato janë shkatërruar plotësisht.
Për këtë arsye, Estonia synon tani të luftojë për çdo pëllëmbë territori dhe të kryejë që në ditën e parë të një pushtimi goditje të fuqishme ndaj objektivave ruse qindra kilometra pas vijës së frontit.
“Ushtarakisht, kjo është shumë kërkuese. Nuk mund ta formësojmë armikun duke u tërhequr apo duke e joshur taktikisht në situata të caktuara. Duhet t’i ndërtojmë linjat tona sot. Kjo është mbrojtje përpara”, tha Kundla.
Inteligjenca ushtarake estoneze është veçanërisht e shqetësuar për mundësinë e një aksioni të kufizuar rus kundër një objektivi kufitar, veçanërisht qytetit të vogël të Narvës, ku shumica e banorëve janë rusishtfolës.
Sipas vlerësimeve estoneze, një veprim i tillë mund të përdorej nga Moska si test për vendosmërinë e NATO-s dhe si përpjekje për të krijuar përçarje brenda aleancës.
