Loading ...Gjashtë fëmijë të moshës 5 dhe 6 vjeç në qytetin e Korçës dyshohet se janë helmuar nga ushqimi i konsumuar në kopsht. Sipas burimeve, fëmijët janë paraqitur në spital me simptoma gastroenteriti, në të njëjtën ditë.
Burime pranë familjarëve thonë se fëmijët e konsumojnë drekën në kopsht. Rastet janë paraqitur njëri pas tjetrit, ndërsa policia ka nisur hetimet për zbardhjen e rrethanave të ngjarjes.
Sipas të njëjtave burime, gjashtë fëmijët kanë konsumuar pilaf për drekë, ditën e djeshme.
Megjithatë, ende nuk është konfirmuar zyrtarisht nëse bëhet fjalë për helmim ushqimor apo për një virozë. Pritet që autoritetet të kryejnë veprimet e nevojshme hetimore dhe të përcaktojnë shkakun e simptomave të shfaqura te fëmijët.
