Loading ...
Bashkimi Evropian po shqyrton mundësi të reja për menaxhimin e flukseve të emigracionit të parregullt, në një kohë kur vendet anëtare po kërkojnë mekanizma më të shpejtë për reagimin ndaj mbërritjeve të papritura dhe në shkallë të gjerë.
Pas miratimit të rregullave të reja për kthimin e migrantëve, në institucionet evropiane ka nisur diskutimi për krijimin e një kuadri emergjent që, në rrethana të veçanta, do të mundësonte masa të jashtëzakonshme në fushën e azilit dhe kthimeve.
Komisioni Evropian ka propozuar një plan të përbërë nga pesë pika, që synon të parandalojë dhe të menaxhojë situatat kur numri i mbërritjeve rritet ndjeshëm brenda një periudhe të shkurtër. Kjo çështje ishte pjesë e diskutimeve mes ministrave të Brendshëm të vendeve anëtare, të mbledhur në Luksemburg.
Komisioneri evropian për Punët e Brendshme, Magnus Brunner, deklaroi se sistemi ekzistues vazhdon të funksionojë, por duhet të jetë në gjendje të përshtatet me zhvillimet dhe situatat e reja. Një prej drejtimeve ku pritet të ketë më shumë vëmendje është forcimi i rolit të Frontex-it, veçanërisht në zbatimin e procedurave të kthimit.
Në diskutim është edhe krijimi i një mekanizmi të posaçëm për situatat e jashtëzakonshme. Ky mekanizëm do të mund të aktivizohej në rast të një fluksi të papritur dhe masiv migrantësh, të ngjashëm me situatat e regjistruara më parë në Ceuta.
Ministri i Brendshëm i Gjermanisë, Alexander Dobrindt, argumentoi se duhet bërë një dallim i qartë mes situatave humanitare dhe rasteve që autoritetet i konsiderojnë si pjesë të një “sulmi hibrid”. Në skenarin e dytë, ai mbështet përdorimin e procedurave më të shpejta, të cilat do të ishin jashtë mekanizmave standardë të shqyrtimit të azilit.
Një qëndrim më të ashpër shfaqi edhe ministri grek i Brendshëm, Thanos Plevris. Ai kërkoi kontrolle më të forta në kufij dhe mundësinë e pezullimit të përkohshëm të disa rregullave të azilit në rrethana të jashtëzakonshme.
Në Francë, qasja është më e kujdesshme. Ministrja Marie-Pierre Vedrenne theksoi se para se të miratohen masa të reja, duhet të vihet plotësisht në zbatim kuadri që tashmë është miratuar nga BE-ja.
Brunner, ndërkohë, nënvizoi se edhe në raste emergjente reagimi evropian duhet të jetë i shpejtë dhe fleksibël. Sipas tij, respektimi i ligjit ndërkombëtar dhe garantimi i të drejtave të njeriut mbeten kufij të panegociueshëm. Paralelisht, ai theksoi se mbrojtja e kufijve të jashtëm të BE-së do të vazhdojë të jetë prioritet.
Diskutimet pritet të vijojnë në Këshillin Evropian pas dy javësh, ndërsa Komisioni Evropian pritet të paraqesë më pas një propozim më konkret.
PPE kërkon rregulla të reja për rastet e “sulmit hibrid”
Debati është zgjeruar edhe në nivelin e forcave politike evropiane. Partia Popullore Evropiane, grupimi më i madh politik në BE, ka kërkuar rregulla që do t’u mundësonin vendeve anëtare të refuzonin hyrjen dhe të kthenin migrantë të parregullt pa kaluar domosdoshmërisht në procedurat individuale të azilit, në rastet kur autoritetet i konsiderojnë ata pjesë të një “sulmi hibrid”.
Nëse një mekanizëm i tillë do të miratohej, ai do të sillte ndryshime të rëndësishme në mënyrën se si trajtohen kërkesat për mbrojtje ndërkombëtare.
Në të njëjtën kohë, ministrat e Brendshëm të vendeve të BE-së kanë miratuar rregulla të reja që parashikojnë mundësinë e transferimit të migrantëve në qendra kthimi të vendosura në vende të treta, pra jashtë shtetit të origjinës së tyre.
Gjermania, Austria, Greqia, Danimarka dhe Holanda janë duke diskutuar një marrëveshje me Ruandën dhe Ugandën për krijimin e strukturave të tilla. Sipas diskutimeve aktuale, një marrëveshje mund të arrihet deri në fund të vitit.
Shqetësime për qendrat e kthimit në Afrikë
Propozimet kanë shkaktuar reagime dhe shqetësime në Parlamentin Evropian. Eurodeputetja e të Gjelbërve, Anna Stroelenberg, e cila së fundmi është kthyer nga Uganda, ngriti pikëpyetje mbi kapacitetet e vendit për të përballuar një përgjegjësi të tillë, duke pasur parasysh se Uganda strehon aktualisht rreth 2.7 milionë refugjatë.
Ajo vuri gjithashtu në diskutim garancitë që do t’u ofroheshin personave LGBT, duke iu referuar kuadrit ligjor të Ugandës.
Shqetësime janë shprehur edhe për Ruandën. Eurodeputetja Tineke Strik argumentoi se autoritetet e këtij vendi mund të vendosin kritere të kufizuara për pranimin e migrantëve në qendrat e kthimit. Sipas saj, mbeten gjithashtu pikëpyetje në lidhje me mundësinë e strehimit të personave që janë kundërshtarë politikë.
Kontrollet kufitare në Schengen
Në një zhvillim tjetër, Komisioni Evropian nuk ka kundërshtuar zgjatjen e kontrolleve kufitare në hapësirën Schengen nga Italia. Masa të ngjashme janë ndërmarrë edhe nga Spanja.
Komisioneri Brunner deklaroi se legjislacioni evropian lejon rikthimin e përkohshëm të kontrolleve kufitare në rrethana të caktuara dhe se veprimet e Komisionit janë në përputhje me kuadrin ligjor të BE-së.
Kjo qasje është kundërshtuar nga disa ish-komisionerë evropianë, përfshirë Josep Borrell, Laszlo Andor, Joaquin Almunia dhe Nicolas Schmit. Ata kanë firmosur një ankesë formale, e mbështetur nga organizata “The Good Lobby”, profesori Alberto Alemanno dhe rreth 100 akademikë.
Debati për politikën e migracionit pritet të vijojë në javët e ardhshme, ndërsa institucionet evropiane do të përballen me sfidën për të harmonizuar forcimin e kontrollit kufitar me detyrimet që burojnë nga ligji ndërkombëtar dhe mbrojtja e të drejtave të njeriut.
