Loading ...
E kishim humbur plotësisht besimin te kjo skuadër.
Kaq vite dështime kishin bërë që Italia të shihej si “e sëmura e futbollit botëror”, veçse këtë herë në Turqi ndodhi një rrufe si në qiell të pastër.
Të Kaltrit triumfuan 4-1 në stadiumin e “Bursës”, përballë 34 000 tifozëve fanatikë, duke treguar një fytyrë krejt tjetër në krahasim me atë që kishim parë të paktën që nga viti 2021.
Kredencialet në Ligën e Kombeve tani janë në rregull, pas humbjes zhgënjyese ndaj Belgjikës në Romë, ndonëse siç e thanë trajneri Roberto Mançini pas ndeshjes, dhe po ashtu mediat në Apenine, rruga është e gjatë.
I rikthyeri Bastoni, pastaj Fratezi dhe I riu Kajode shënuan që në pjesën e parë, ndërsa pas pushimit shumë shpejt erdhën golat nga Barish Jilmaz për turqit dhe Espozito për italianët.
Gjithçka përfundoi deri në 50’.
A thua zhgënjimi I tre eliminimeve radhazi nga Kupat e Botës duhet të quhet I kaluar?
Mos vallë, Mançini do të kthehet si fitues, ashtu siç bëri në Europianin e vitit 2021, kur Italia u shpall kampione?
Duhet të presim për ta parë, por ky ekip këtë herë bindi.
“Lulja e Italisë, – titullon më në fund e çliruar “La Gazeta delo Sport”, – revolucioni funksionon! Pio dhe Espozito së bashku, Kajode më i miri! Rruga është e gjatë!”
“Mançini, vazhdo kështu, – e nxit e përditshmja “Il Korriere delo Sport”, trajnerin e kaltër, – Italia dominon, 4-1 në Turqi! Të premten vjen Franca!”
Vetë Mançini deklaroi se fitorja ishte shumë e rëndësishme, dhe se pjesa e parë ishte shumë e mirë, ndonëse pas pushimit sikur pati rënie në lojë.
Trajneri nxiti lojtarët të vazhdonin kështu, por vlerësoi reagimin e tyre.
Tashmë, në radhë është ndeshja e madhe me Francën në Paris në 2 tetor, dhe pastaj vizita e Turqisë në Bolonjë në 5 të muajit të ardhshëm.
