Loading ...
Bangkoku nën ujë. Autoritetet e kryeqytetit tajlandez kanë shpallur gjendjen e katastrofës në të 50 distriktet e qytetit, pas reshjeve të dendura që kanë shkaktuar përmbytje të mëdha dhe kanë paralizuar qarkullimin në disa zona.
në kryeqytet kanë rënë rreth 300 milimetra shi, ndërsa reshjet kanë vijuar për afro 48 orë pa ndërprerje. Zonat lindore të Bangkokut janë ndër më të prekurat, ku kanalet janë mbushur dhe uji ka dalë në rrugë, banesa, dyqane dhe ambiente biznesi.
Pamjet nga kryeqyteti tregojnë rrugë të mbuluara nga uji, automjete të bllokuara dhe banorë që detyrohen të lëvizin në ujë. Në disa zona, niveli i ujit ka arritur deri në gju dhe, në raste të tjera, deri në bel, duke vështirësuar ndjeshëm lëvizjen.
Autoritetet kanë vënë në punë sistemet e pompimit për largimin e ujit. Janë hapur gjithashtu qendra të përkohshme strehimi, ndërsa janë përgatitur rreth një milion thasë me rërë për zonat e prekura.
Vëmendje e veçantë po i kushtohet personave të moshuar dhe qytetarëve që kanë nevojë për ndihmë mjekësore.
Ndërkohë, autoritetet meteorologjike tajlandeze kanë paralajmëruar për reshje të dendura dhe shumë të dendura edhe gjatë ditëve në vijim. Rreziku për përmbytje të shpejta dhe daljen e ujërave nga kanalet mbetet i lartë.
Për Tajlandën, situata sjell edhe kujtimet e përmbytjeve katastrofike të vitit 2011. Atëherë, përmbytjet në shkallë kombëtare shkaktuan më shumë se 500 viktima dhe dëmtuan miliona banesa./abcnews.al
