Loading ...
Presidenti francez, Emmanuel Macron, ka paralajmëruar liderët politikë të vendit për rritjen e kërcënimeve që, sipas shërbimeve franceze të inteligjencës, lidhen me luftën hibride të Rusisë ndaj vendeve evropiane që mbështesin Ukrainën.
Gjatë një takimi me dyer të mbyllura, ku morën pjesë edhe drejtues të shërbimeve sekrete franceze, Macron u prezantoi përfaqësuesve politikë dokumente, harta dhe skenarë mbi rreziqet e mundshme ndaj Francës.
Sipas “La Repubblica”, autoritetet franceze janë veçanërisht të shqetësuara për mundësinë e sabotimeve, sulmeve me dronë dhe operacioneve kibernetike që mund të shkaktojnë pasoja të mëdha pa qenë domosdoshmërisht sulme ushtarake konvencionale.
Një burim i inteligjencës franceze, i cituar nga gazeta, tha se do të ishte “e papërgjegjshme” që Franca të mos përgatitej për atë që tashmë po ndodh në vendet fqinje.
Sipas analizës së autoriteteve, dronët mund të përdoren për të ndërprerë trafikun në aeroporte, për të penguar zinxhirët logjistikë, për t’iu afruar objekteve strategjike industriale ose për të detyruar mbylljen e infrastrukturave të rëndësishme.
Qeveria franceze ka rritur nivelin e vigjilencës dhe po harton një plan të posaçëm për mbrojtjen e infrastrukturave kritike dhe objekteve të industrisë së mbrojtjes nga dronët dhe sulmet kibernetike.
Në të njëjtën kohë, Parisi po shqyrton mundësinë që operatorë privatë të disa infrastrukturave jetike të pajisen, nën kontroll të rreptë, me mjete për neutralizimin e dronëve.
Një tjetër shqetësim i autoriteteve franceze lidhet me ndërhyrjet kibernetike dhe fushatat e ndikimit. Sipas inteligjencës franceze, Rusia mund të përdorë rrjete llogarish dhe sisteme të amplifikimit artificial për të krijuar perceptimin e një reagimi spontan të opinionit publik.
Qëllimi, sipas këtij vlerësimi, nuk do të ishte domosdoshmërisht mbështetja e një kandidati të caktuar, por nxitja e konfuzionit, thellimi i përçarjeve dhe dobësimi i besimit te procesi demokratik.
Macron ka deklaruar se kërcënimi “ekziston dhe është real”, ndërsa ka paralajmëruar se Franca duhet të jetë e përgatitur edhe për mundësinë e një sulmi fizik në territorin e saj.
