Loading ...
Presidenti amerikan Donald Trump do të presë këtë javë në Washington homologun e tij kinez, Xi Jinping, në një takim që zhvillohet në një periudhë kur marrëdhëniet mes dy ekonomive më të mëdha të botës vijojnë të jenë të tensionuara.
Vizita e Xi Jinping në SHBA nis të mërkurën dhe shënon rikthimin e tij në Washington pas një dekade. Ky do të jetë takimi i tretë mes dy liderëve që prej rikthimit të Trump në Shtëpinë e Bardhë.
Edhe pse nuk pritet që takimi të prodhojë një marrëveshje të madhe, të dyja palët synojnë të ruajnë kanalet e komunikimit dhe të shmangin një përshkallëzim të mëtejshëm të tensioneve.
Nga lufta tregtare drejt një konkurrence më të kontrolluar
SHBA-të dhe Kina kanë arritur të zbusin tensionet e luftës tregtare të vitit të kaluar, kur të dyja vendet vendosën tarifa shumë të larta ndaj produkteve të njëra-tjetrës. Megjithatë, rivaliteti mes Washingtonit dhe Pekinit vazhdon.
Në vend të tarifave të gjera, të cilat mund të kenë pasoja për tregtinë globale, të dyja fuqitë po orientohen drejt masave më të fokusuara, duke vendosur kufizime ndaj kompanive dhe produkteve të caktuara.
Washingtoni synon të ruajë avantazhin e tij në teknologji dhe ekonomi, ndërsa Pekini po përpiqet të forcojë rolin e Kinës në ekonominë dhe rendin global.
Inteligjenca artificiale, një tjetër pikë përplasjeje
Inteligjenca artificiale përbën një nga çështjet kryesore në rivalitetin mes dy vendeve.
SHBA-të kanë kufizuar eksportet drejt Kinës të çipave më të avancuar, të cilët përdoren për zhvillimin e teknologjive të AI-së. Washingtoni ka akuzuar gjithashtu disa kompani kineze se kanë përdorur modele amerikane për zhvillimin e teknologjive të tyre.
Pekini i ka kundërshtuar këto masa, duke akuzuar SHBA-të se po përpiqen të pengojnë zhvillimin e industrisë kineze të inteligjencës artificiale.
Megjithatë, krahas rivalitetit, ka edhe përpjekje për të krijuar forma bashkëpunimi. Sekretari amerikan i Thesarit, Scott Bessent, deklaroi se Washingtoni ka propozuar një mekanizëm për njoftimin e incidenteve të lidhura me AI-në, të cilat mund të përbëjnë rrezik për sigurinë kombëtare.
Irani dhe Tajvani në tryezën e bisedimeve
Në axhendën e takimit Trump-Xi pritet të jenë edhe çështje të tjera të ndjeshme, mes tyre Irani dhe Tajvani.
Administrata Trump po përpiqet të ushtrojë presion ekonomik ndaj Iranit, ndërsa Kina vijon marrëdhëniet tregtare me Teheranin. Pekini është blerësi më i madh i naftës iraniane dhe një prej partnerëve kryesorë tregtarë të Iranit.
Deri tani, Washingtoni ka treguar kujdes në vendosjen e masave të reja ndaj Kinës për shkak të marrëdhënieve të saj me Iranin, duke synuar të mos ndikojë negativisht në takimin mes Trump dhe Xi.
Tajvani mbetet një tjetër çështje e ndjeshme. Kina e konsideron ishullin pjesë të territorit të saj, ndërsa SHBA-të kanë detyrime ligjore për të ndihmuar Tajvanin në forcimin e kapaciteteve të tij mbrojtëse.
Takimi në Washington zhvillohet në një klimë ku SHBA-të dhe Kina po përpiqen të ruajnë stabilitetin në marrëdhëniet dypalëshe, ndërsa njëkohësisht vijojnë konkurrencën për tregtinë, teknologjinë dhe ndikimin në skenën globale.
