Loading ...
Një hetim i BBC-së ka zbuluar se rënia e numrit të varkave të vogla që kalojnë ilegalisht Kanalin Anglez po i detyron rrjetet e kontrabandës së emigrantëve të ndryshojnë mënyrën e tyre të veprimit.
Sipas BBC-së, grupet kriminale po përdorin gjithnjë e më shumë varka më të mëdha, të ashtuquajtura “mega-varka”, për të transportuar një numër më të madh personash në një udhëtim të vetëm.
Një rast i tillë u regjistrua javët e fundit, kur një varkë rreth 15 metra e gjatë transportoi 230 persona drejt Mbretërisë së Bashkuar, duke shkaktuar reagime të forta nga politikanët dhe mediat britanike.
Hetimi i BBC-së në brigjet veriore të Francës tregon se bandat po përballen me vështirësi për të siguruar varkat e vogla. Për këtë arsye, grupe kriminale që më parë vepronin të ndara po bashkëpunojnë, duke grumbulluar më shumë emigrantë në një numër më të vogël varkash.
Çmimi për kalimin arrin deri në 2 mijë euro
Sipas burimeve të BBC-së, rritja e kontrolleve nga policia franceze ka reduktuar mundësitë për kalim. Autoritetet franceze pretendojnë se po ndalojnë rreth dy të tretat e varkave të vogla përpara se ato të largohen nga brigjet.
Kjo ka ndikuar edhe në çmimet e kërkuara nga kontrabandistët. Aktualisht, emigrantët raportohet se paguajnë deri në 2 mijë euro për person, ndërsa një vit më parë shifra ishte rreth 1,300 euro.
Në disa raste, pagesa kërkohet paraprakisht dhe në para cash.
BBC ka dokumentuar një operacion në plazhin e Gravelines, ku një varkë e vogël kryente disa udhëtime për të marrë grupe emigrantësh. Në fund, rreth 82 persona hipën në bord dhe u nisën drejt Kanalit Anglez.
Sipas autoriteteve franceze, ndërhyrja në momentin kur emigrantët janë tashmë në ujë është e vështirë, për shkak të rrezikut që njerëzit të mbyten.
Emigrantët presin javë ose muaj për një mundësi
Për shkak të forcimit të kontrolleve, emigrantët që synojnë të kalojnë Kanalin mund të presin tani javë apo edhe muaj, në vend të disa ditëve.
Moti është një tjetër faktor vendimtar. Sipas BBC-së, kushtet ideale për një kalim me varka të vogla janë erëra nën 5 nyje dhe dallgë më të ulëta se 0.8 metra.
Për të shmangur zbulimin, disa emigrantë po qëndrojnë më pranë plazheve, në pyje dhe mes dunave, në vend të kampeve më të mëdha ku mund të marrin ushqim, ujë dhe ndihmë mjekësore.
Ekipi i BBC-së sulmohet në Francë
Gjatë hetimit në një prej kampeve pranë Dunkirkut, ekipi i BBC-së u përball edhe me kontrabandistë të njerëzve.
Një prej tyre tentoi t’i merrte kamerën ekipit dhe më pas sulmoi me gurë gazetarët. Kameramani i BBC-së, Pol, u godit në fytyrë dhe u detyrua të merrte disa qepje.
BBC raporton se situata në zonë është tensionuar ndjeshëm, ndërsa policia franceze ka intensifikuar operacionet kundër kampeve dhe rrjeteve të kontrabandës.
Britania dhe Franca forcojnë bashkëpunimin
Mbretëria e Bashkuar dhe Franca po njoftojnë masa të reja për të rritur praninë policore në bregdetin francez dhe për të parandaluar kalimet ilegale të Kanalit.
Autoritetet britanike kanë përshëndetur punën e policisë franceze, duke theksuar se numri i kalimeve është ulur në nivelin më të ulët në gjashtë vjet.
Megjithatë, BBC thekson se mijëra persona vazhdojnë të hyjnë në Mbretërinë e Bashkuar me varka të vogla, ndërsa ndryshimet në politikat e migracionit, kushtet atmosferike dhe lëvizjet e njerëzve e bëjnë situatën më komplekse.
Për rrjetet e kontrabandës, presioni në rritje duket se nuk po e ndal aktivitetin, por po i shtyn ato të ndryshojnë taktikat dhe të përdorin mjete më të mëdha, duke rritur njëkohësisht rrezikun për jetën e emigrantëve në Kanal.
/abcnews.al/
