Loading ...
Që nuk janë kohë të mira për Gianni Infantino, kjo ishte kuptuar prej javësh. Por presidenti i FIFA, e ardhmja e të cilit është në dyshim pas planit tashmë të braktisur për t’i hapur dyert investitorëve privatë, tashmë po sulmohet edhe nga armët e tij. Një pjesë e mirë e ish-yjeve të futbollit, që përbëjnë skuadrën e “Legjendave të FIFA”, të krijuar nga Infantino dhe të përdorur prej tij si “skenografi” në tribuna gjatë ndeshjeve të turneve të mëdhenj i kanë dalë kundër.
Një deklaratë e përbashkët dhe me tone të ashpra, e firmosur nga ish lojtarë si Veron, Pires, Petit, Silvestre e të tjerë kërkon dorëheqjen e Infantino dhe ndryshim të kursit në krye të FIFA.
Ata kritikojnë mënyrën se si vendimet strategjike të marra vitet e fundit e kanë larguar gradualisht institucionin nga vlerat themelore të sportit dhe nga baza e tifozëve të tij.
“Ndryshimi është i domosdoshëm. Pushteti ka mjegulluar aftësinë e udhëheqjes aktuale për të dalluar interesat e tyre personale nga ajo që është më e mira për futbollin. Ngjarjet e fundit e kanë bërë të pamundur heshtjen. Mjaft më”, lexohet në deklaratën shpërndarë për mediat, që mbyllet me një tjetër kërkesë për angazhime dhe veprime të shpejta në ndryshimin e udhëheqjes së qeverisë botërore të futbollit.
