Loading ...
Shërbimi Sekret i SHBA-së ka deklaruar se është në dijeni të një videoje të transmetuar nga televizioni shtetëror iranian, e cila duket se kërcënon jetën e Barron Trump, djali më i vogël i Presidentit Donald Trump.
Mediat iraniane kanë publikuar vazhdimisht përmbajtje që kërcënojnë jetën e presidentit dhe familjes së tij, sidomos pas vrasjes së ish-udhëheqësit suprem Ayatollah Ali Khamenei dhe familjarëve të tij në fillim të luftës SHBA-Izrael me Iranin në shkurt. Kjo është hera e parë që Barron Trump përmendet publikisht si objektiv.
Videoja tre-minutëshe fillon me një grafik në anglisht ku shkruhet: “Where to kill Barron Trump?!”, (Ku të vrasim Barron Trump) dhe paraqet vende ku ai dihet se kalon kohë, përfshirë Trump Tower në New Jork. Në fund, narratori sugjeron se njerëzit “po presin me padurim të marrin shpërblimin prej 10 milionë dollarësh”.
Një burim federal tha se kjo video është pjesë e një fushate të Iranit që synon familjen Trump, duke përfshirë detaje lëvizjesh dhe sugjerime për vrasje. Shërbimi Sekret ka theksuar se çdo kërcënim ndaj personave të mbrojtur hetohet, por nuk jepen detaje për arsye sigurie operative.
Presidenti Trump ka folur publikisht për kërcënimet iraniane ndaj jetës së tij, duke i quajtur “njerëz të ligë e të sëmurë”. Ai i bëri këto komente në samitin e NATO-s në Turqi, përpara se të largohej në fshehtësi me një avion ushtarak alternativ, pas një kërcënimi që u mor seriozisht nga zyrtarët. SHBA-të kanë paralajmëruar prej kohësh se Irani mund të tentojë të vrasë Trump, sidomos pas sulmit me dron në vitin 2020 që vrau gjeneralin e lartë iranian Qasem Soleimani.
Gjatë ceremonive të gjata të varrimit të Khameneit në korrik, mbështetësit e regjimit mbanin postera me mbishkrimin “Kill Trump” (Vrit Trump) dhe ofronin shpërblime për hakmarrje. Që prej Revolucionit Islamik të vitit 1979, mitingjet e organizuara nga shteti iranian kanë përfshirë vazhdimisht slogane anti-amerikane si “Vdekje Amerikës” dhe djegie flamuri.
