Loading ...
Më shumë se një dekadë pas zhdukjes së një 22-vjeçareje gjermane, rasti i saj po rikthehet në vëmendje pas zbulimit të informacioneve të reja në dosjet e Jeffrey Epstein.
Michelle u largua nga banesa e nënës së saj në shtator të vitit 2015, duke marrë me vete një valixhe dhe pasaportën. Familjarët e saj nuk u shqetësuan menjëherë, pasi e reja udhëtonte shpesh jashtë vendit dhe po ndiqte ëndrrën për t’u bërë modele. Por këtë herë, ajo nuk u kthye më.
Rasti është rikthyer në qendër të vëmendjes pas një hetimi të përbashkët të rrjetit gjerman ZDF, revistës Der Spiegel dhe grupit investigativ Paper Trail Media, të cilët kanë shqyrtuar dokumentet e bëra publike që lidhen me Jeffrey Epstein.
Në qendër të zbulimeve është Daniel Siad, një shtetas suedez me origjinë algjeriane dhe skaut modelesh, i cili ishte njohur me Michelle në vitin 2012 në Dubai, ku ajo punonte si kamariere. Siad iu prezantua si një person që mund ta ndihmonte të hynte në industrinë e modës.
Në vitet që pasuan, Michelle realizoi sete fotografike, mori pjesë në aktivitete të lidhura me modelingun dhe udhëtoi në vende të ndryshme, përfshirë Kinën, Britaninë e Madhe dhe Amerikën e Jugut.
Sipas hetimit, në vitin 2014, një vit para zhdukjes së saj, Siad dyshohet se i dërgoi Jeffrey Epstein fotografi të Michelle, e cila në atë kohë ishte 21 vjeçe. Në një mesazh, ai e përshkroi të renë si një “person të mrekullueshëm” dhe i shkroi Epstein: “Do ta duash do ta dashurosh”.
Dokumentet sugjerojnë gjithashtu se Siad kishte diskutuar mundësinë e sigurimit të një bilete avioni për Michelle. Megjithatë, deri më tani nuk ka prova se e reja ka takuar ndonjëherë Epstein, se e dinte që fotografitë e saj i ishin dërguar atij apo se Siad kishte lidhje me zhdukjen e saj.
Hetimi ka zbuluar gjithashtu se emri i Daniel Siad shfaqet rreth 1,840 herë në email-e, mesazhe dhe të dhëna telefonike të përfshira në dokumentet e lidhura me Epstein.
Një komunikim i vitit 2014 ka tërhequr vëmendjen e hetuesve, pasi Siad dyshohet se e krahasoi aktivitetin e tij me atë të një “peshkatari”, duke thënë se herë pas here arrinte të gjente “peshq” të mirë. Në të njëjtin komunikim ai përmendte edhe vajza të reja nga Skandinavia dhe Franca.
Misteri i zhdukjes së Michelle mbetet i pazgjidhur edhe pas 11 vitesh. Daniel Siad, një prej personave që mund të kishte pasur informacione mbi periudhën para zhdukjes së saj, u gjet i vdekur më 20 korrik 2026 në banesën e tij në Paris, në moshën 69-vjeçare.
