Loading ...
Dy persona janë vënë përballë drejtësisë në Fier, pasi dyshohet se ndezën zjarr në tokat e tyre bujqësore për djegien e mbetjeve bimore, por flakët dolën jashtë kontrollit, duke përfshirë sipërfaqe me shkurre, ullinj dhe bimësi të ndryshme, si dhe duke rrezikuar banesa pranë zonave të prekura.
Sipas Policisë së Fierit, shërbimet policore, në bashkëpunim me Komisariatin e Policisë Fier, identifikuan dhe kapën autorët e dyshuar vetëm pak orë pas ngjarjeve.
Në pranga u vu shtetasi 58 vjeç, banues në fshatin Varibop, i cili u kap në flagrancë pranë vatrës së zjarrit që kishte ndezur në tokën e marrë me qira prej tij. Gjatë shoqërimit në ambientet e Policisë, 58-vjeçari ka kundërshtuar efektivët.
Ndërkohë, nisi procedimi penal në gjendje të lirë për shtetasen 78 vjeçe, banuese në fshatin Fermë Rroms, e cila u kap pranë një zjarri të ndezur në afërsi të banesës së saj.
Nga hetimet paraprake rezulton se zjarret, të ndezura për djegien e mbetjeve bimore, u përhapën në sipërfaqe të konsiderueshme, duke shkaktuar dëme në bimësi, pemë frutore dhe duke rrezikuar banesat përreth.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.
