Loading ...
Momenti kur një foshnjë vjen në jetë është një nga përjetimet më të fuqishme për çdo familje. Pikërisht këtë çast unik ka zgjedhur të dokumentojë përmes objektivit të saj fotografja Armejsa Kullolli, e cila prej vitesh është specializuar në fotografinë e lindjes dhe paslindjes, një zhanër ende pak i njohur në Shqipëri.
E diplomuar në Universitetin e Arteve në degën Regji Filmi dhe Televizioni, ndërsa më pas me studime master në Marketing dhe Inovacion, Armejsa vendosi të ndjekë një rrugë profesionale të veçantë. Në vitin 2022 ajo u certifikua në fotografinë e lindjes dhe paslindjes, duke e kthyer këtë pasion në mision.
Përmes brand-it të saj “Birthmark”, ajo dokumenton momentet e para të jetës së një fëmije, duke kapur emocionet më të forta të prindërve në ditën që ndryshon përgjithmonë jetën e tyre.
Deri më sot, Armejsa ka qenë e pranishme në qindra lindje në maternitetet kryesore të Tiranës. Nga lindjet natyrale dhe cezarianet, deri te rastet me binjakë apo ndërhyrjet urgjente, ajo ka krijuar një arkiv unik me histori reale shqiptare, të mbushura me emocione, sakrifica dhe lumturi.
Megjithatë, rrugëtimi i saj nuk ka qenë i lehtë. Një nga sfidat më të mëdha ka qenë lejimi i fotografimit në sallat e lindjes. Sipas saj, shpeshherë politikat spitalore dhe paragjykimet ndaj këtij lloji dokumentimi kanë krijuar pengesa për të qenë pranë nënave në momentet më të rëndësishme të jetës së tyre.
“Ka kohë që nuk më lejohet të jem pjesë e kujtimeve të disa nënave me fëmijët e tyre. Shpresoj që kjo situatë të ndryshojë, sepse fotografia e lindjes nuk cenon procesin, por ruan një kujtim të pazëvendësueshëm”, shprehet ajo.
Në fillimet e saj, ideja e një fotografeje në sallën e lindjes u prit me skepticizëm, madje shpesh me refuzim dhe paragjykim. Sot, sipas Armejsës, ky koncept po fiton gjithnjë e më shumë mbështetje dhe po shndërrohet në një trend që shumë familje e kërkojnë.
Përveç punës së saj të përditshme, fotografja ka prezantuar edhe ekspozitën e saj të dytë kushtuar lindjes. Përmes fotografive, ajo synon të sjellë para publikut forcën, emocionin dhe bukurinë e momentit kur një jetë e re vjen në botë.
“Lindja është një vepër arti. Është historia më e bukur e dashurisë që një familje mund të përjetojë. Për mua, ardhja në jetë e një fëmije duhet të festohet me zë të lartë dhe me gjithë dashurinë që meriton”, thotë ajo.
Mes qindra historive që ka dokumentuar, lindjet me binjakë mbeten ndër më emocionueset. Dy jetë që vijnë në botë në të njëjtin moment, dy zemra që fillojnë rrugëtimin së bashku dhe emocione të dyfishta për familjen janë disa nga kujtimet që kanë lënë gjurmë te fotografja.
Për Armejsa Kullollin, fotografia e lindjes nuk është thjesht një profesion. Është një mënyrë për të ruajtur kujtimet më të çmuara të jetës dhe për t’i treguar shoqërisë bukurinë e vërtetë të momentit kur fillon një histori e re.
