Loading ...
Autoriteti i Aviacionit Civil të Kuvajtit njoftoi se sulmet iraniane të kryera në hakmarrje për bombardimet amerikane kanë dëmtuar radarin e aeroportit ndërkombëtar të vendit dhe kanë shkaktuar të plagosur, si dhe dëme të konsiderueshme materiale.
Sipas një letre të dërguar Organizatës Ndërkombëtare të Aviacionit Civil (ICAO), radari i aeroportit u godit gjatë sulmeve.
“Radari i aeroportit u shënjestrua në orët e para të mëngjesit”, thuhet në njoftim, ku shtohet se sulmi shkaktoi lëndime te persona të pranishëm dhe dëmtime të mëdha në infrastrukturën e radarit, pajisjet teknike dhe sistemet e menaxhimit të trafikut ajror.
Ky është sulmi i dytë iranian ndaj aeroportit të vetëm ndërkombëtar të Kuvajtit brenda pak më shumë se një jave. Më 3 qershor, një sulm me dronë shkaktoi vdekjen e një shtetasi indian dhe plagosjen e 63 personave të tjerë.
Më herët gjatë ditës, autoritetet kuvajtiane njoftuan rihapjen e hapësirës ajrore për fluturimet komerciale, pasi ajo ishte mbyllur për disa orë për arsye sigurie pas sulmeve.
Përshkallëzimi i tensioneve vjen pasi Shtetet e Bashkuara kryen një seri bombardimesh të reja ndaj objektivave në Iran gjatë së mërkurës dhe së enjtes. Teherani deklaroi se ishte kundërpërgjigjur duke shënjestruar baza ushtarake amerikane në Kuvajt dhe Bahrein.
