Loading ...
Një gjykatë amerikane ka hedhur poshtë pretendimet e ngritura nga Elon Musk kundër OpenAI dhe drejtuesve të saj të lartë. CEO i Tesla i akuzoi ata se tradhtuan një vizion të përbashkët që kompania të mbetet një organizatë jofitimprurëse e dedikuar për të udhëhequr zhvillimin e inteligjencës artificiale për të mirën e njerëzimit.
Juria prej nëntë personash arriti në përfundimin se Musk priti shumë gjatë për të paraqitur padinë e tij dhe humbi një afat ligjor. Pas një gjyqi tre-javor, juria diskutoi për më pak se dy orë.
Miliarderi Musk, një investitor i hershëm në kompaninë e inteligjencës artificiale, paditi drejtorin ekzekutiv të OpenAI, Sam Altman, presidentin e saj, Greg Brockman, dhe Microsoft për tradhti të dyshuar të një marrëveshjeje për mbajtjen e OpenAI si një organizatë jofitimprurëse që i sjell dobi njerëzimit.
Musk pretendon se është mashtruar kur Altman e transformoi kompaninë në një ndërmarrje fitimprurëse.
Gjyqi në Oakland, Kaliforni, hodhi dritë mbi mosmarrëveshjen e hidhur midis dy titanëve të Silicon Valley dhe fillimet e OpenAI, tani një kompani me vlerë 852 miliardë dollarë.
Altman dhe OpenAI pretenduan se nuk kishte kurrë një premtim për ta mbajtur OpenAI një organizatë jofitimprurëse përgjithmonë. Në fakt, argumentuan ata, Musk e dinte këtë dhe ngriti padinë e tij sepse nuk mund të kishte kontroll të njëanshëm mbi zhvilluesin e Inteligjencës Artificiale me rritje të shpejtë.
