Loading ...
Presidenti francez Emmanuel Macron tha sot se Franca mbështet tregtinë e lirë dhe të ndershme, duke shtuar se “të gjitha opsionet janë në tryezë” kur bëhet fjalë për përgjigjen e Bashkimit Evropian ndaj vendimit të Shteteve të Bashkuara për të rritur tarifat për makinat nga BE.
Duke folur në një konferencë për shtyp në Jerevan, Macron tha se ka marrëveshje të nënshkruara që duhet të respektohen.
“Ka marrëveshje që janë nënshkruar dhe që duhet të respektohen. Nëse ato do të viheshin në pikëpyetje, gjithçka do të duhej të rihapej”, tha Macron.
Ai shtoi se Bashkimi Evropian ka në dispozicion mekanizma që mund të aktivizohen në rast të një kërcënimi për tarifat doganore.
Presidenti francez Emmanuel Macron bëri thirrje sot për hapjen e përbashkët të Ngushticës së Hormuzit me anë të një marrëveshjeje midis Iranit dhe Shteteve të Bashkuara të Amerikës.
Macron, në një deklaratë para fillimit të Samitit të Komunitetit Politik Evropian (EPC) në Jerevan, përjashtoi çdo pjesëmarrje të Francës në “Projektin e Lirisë” të shpallur mbrëmë nga Presidenti i SHBA-së Donald Trump për të rivendosur lirinë e lundrimit në Ngushticën e Hormuzit, raporton BFM TV.
“Ne nuk do të marrim pjesë në diçka që nuk është e qartë”, tha Macron.
Duke iu referuar situatës në Lindjen e Mesme, ai vlerësoi gjithashtu se është thelbësore të respektohet armëpushimi midis Izraelit dhe Libanit.
“Është një detyrim që palët e kanë ndërmarrë dhe e them këtë për hir të sovranitetit, pavarësisë së Libanit dhe mbrojtjes së popullsisë civile”, tha Macron.
