Loading ...Asgjë nuk i ka mbetur familjes Vogli. Apartamenti në katin e katërt në kompleksin “Arlis” pranë Qendrës Spitalore Universitare “Nënë Tereza” në Tiranë është shkrumbuar me gjithçka kishte brenda.
“Jam futur dje kam parë, asgjë s’ka ngelur, çdo gjë është djeg shkrumbuar fare”, thotë ai.
Pasditen e të martës kur në pallatin 12 katësh ku banon ra zjarr Alberti nuk ishte në shtëpi. Tregon se u kthye menjëherë, por flakët ishin përhapur me shpejtësi.
“Më njoftuan. Erdha direkt. U afrova këtu , ishte përfshirë vendi në flakë.”
Dëmi i shkaktuar është i madh, ndërsa familja me pesë anëtarë ka mbetur pa strehë.
“Arlis”, kompania ndërtuese e pallatit deklaroi një ditë më parë se do tu kthejë apartamentet e shkatërruara siç kanë qenë, por banorët thonë se me ta nuk ka komunikuar ende askush.
“Kemi dëgjuar nëpër lajme, por këtu s’ka ardhë njeri të na thotë. Kërkojmë të na rikthehet prap apartamenti siç ka qenë”-shtoi ai.
Të paktën rreth 30 apartamente janë shkatërruar plotësisht ndërsa të tjerë pjesërisht. Kjo sipas të dhënave paraparake pasi ende nuk ka një përllogaritje të saktë të dëmit.
Disa prej banorëve kanë hyrë në banesë për të parë çfarë u ka mbetur pas zjarrit, por në shumë prej apartamenteve në këtë pallat flakët kanë shkrumbuar çdo gjë./abcnews.al
