Loading ...
Ajo që ndodhi në Varshavë nuk do të harrohet lehtë.
Pritshmëria ishte e madhe për fitore ndaj Polonisë dhe vazhdim drejt ëndrrës së Kupës së Botës, por gjithsesi jeta duhet të vazhdojë.
Trajneri Silvinjo, që nuk dihet nëse do të vazhdojë në timonin e kombëtares pas korrikut, e ka të qartë këtë dhe vazhdoi me ritualin e punës për rivalin e radhës.
Ndaj Ukrainës do të jetë një miqësore në 31 mars, në Valencia të Spanjës, dhe pikërisht aty, në kompleksin sportiv “Parador El Saler” realizoi seancën e parë stërvitore.
Në dispozicion të brazilianit janë 24 futbollistë pasi Ajeti u largua I dëmtuar në shpatull, dhe Ramadani kërkoi leje për të qenë pranë së shoqes që pret të lindë fëmijë.
Kuqezinjtë u përqendruan në ushtrimet fizike, qarkullimin e topit dhe skema taktike.
Siç njoftohet nga Federata Shqiptare e Futbollit, gjendja e lojtarëve është plotësisht e mirë.
Ndërkaq, Federata njofton se kanë dalë në shitje biletat për këtë ndeshje në stadiumin “Estadi Siudad de Valensia”, ndonëse nuk pritet që interesimi të jetë tepër I madh.
Gjithsesi, pjesa e dhënë për ekipin mik, si gjithmonë 5 për qind e totalit, duhet të blihet.
Duke qenë se stadiumi ka një kapacitet paksa mbi 26 000 vende, tifozët shqiptarë kanë në dispozicion pak mbi 1300 bileta.
Miqësore Ukrainë-Shqipëri do të luhet në 31 mars, në orën 20:45, dhe Silvinjo pritet të bëjë mjaft ndryshime në formacion e mund të shohim Muçin e Mehmetin titullarë./abcnews.al
