Loading ...FINIQ- Kristo Murati është një 80 vjeçar me profesion mësues nga fshati Memoraq në Bashkinë e Finiqit. Duket e pabesueshme, por mësues Muratin e takojmë aty ku di të shprehi veten në mirë, në një shkollë fillore ku jep mësim çdo ditë për nxënësit e tij.
Si i ri, mësuesia nuk ishte në listën e tij të dëshirave për studim, por ajo ju dha, e aty do të lindte pasioni i tij i pavdekshëm për këtë profesion. Mësuesia zuri rrënjë të forta te ai, që për vite u shërbeu institucioneve arsimore me pasion, paçka orëve të gjata për të mbërritur në shkollat ku jepte mësim. Jeta profesionale dhe personale do të ndryshonte rrënjësisht fill pas rënies së komunizmit.
Si një ish komunist në sistemin e ri demokratik ai u pushua nga puna në moshën 55 vjeçare. Aty nisi një tjetër jetë nga e para, në vend të huaj, në gjuhë të huaj ku puna nuk ishte më mësues, por çfarëdo që siguronte jetesën e një emigranti.
Fati do ta sillte që kthimi i tij në Shqipëri në moshën 75 vjeçare, të përkonte me një vend pune të lirë për ironi në shkollën dhe klasën nga ku ai ishte pushuar nga puna në fshatin Dermish.
Drejtoria Arsimore po kërkonte mësues në pension të gatshëm për të shërbyer dhe pasioni i mësues Mutatit nuk mund të thoshte jo.
Rikthimi pas 20 vitesh është shoqëruar me mall por dhe me keqardhje. Klasat i gjeti larg gjendjes që i kishte lënë, ndërsa korridoret nuk gumëzhinin më nga zhurmat e fëmijëve. Tani përditëshmëria e tij e punës ka të bëjë me vetëm 10 fëmijë.
Pas 4 viteve punë, 80-vjeçari nuk e fsheh nostalgjinë për shkollën në vitet e komunizmit, pasi për të, libri ngjallte më shumë atëherë tek nxënësit. Mosha për mësues Muratin nuk është pengesë.
Pasi jep mësim, kthimi në shtëpi i merr 4-5 orë dedikim leximit, me një bibliotekë të pasur që dëshiron ta trashëgojë. Për sa kohë të ndjejë veten mirë fizikisht, Kristo Murati do të shkruajë po me të njëjtin pasion në dërrasën e zezë. 80-vjeçari është dëshmi se puna që dashuron, mund të bëhet gjithë jetën./abcnews.al
