Loading ...
Mbajtja e Europës të sigurt nga moti ekstrem “nuk është shkencë raketash”, deklaroi studiuesi i njohur i klimës Maarten van Aalst, ndërsa Bordi Shkencor Këshillimor Evropian për Ndryshimet Klimatike u bëri thirrje vendeve të përgatiten për një skenar alarmant të ngrohjes globale deri në 3°C.
Sipas Van Aalst, kontinenti tashmë po paguan çmimin e mungesës së përgatitjes ndaj krizës klimatike, por përshtatja me një të ardhme më të nxehtë është në shumë raste çështje logjike dhe masash praktike.
Ai e cilësoi sfidën si të madhe, por njëkohësisht të realizueshme, duke theksuar se zgjidhjet nuk kërkojnë teknologji të pamundura, por vendime të qarta dhe veprim të shpejtë.
Në raportin e ri, bordi këshillimor thekson se përpjekjet aktuale për t’u përshtatur me rritjen e temperaturave janë “të pamjaftueshme, kryesisht graduale dhe shpesh të vonuara”. Dokumenti paralajmëron se deri në vitin 2100 bota mund të përballet me një rritje temperaturash prej 2.8 deri në 3.3°C mbi nivelet paraindustriale, një nivel pothuajse dyfish më i lartë se objektivi për të cilin liderët botërorë u angazhuan me marrëveshjen e klimës të vitit 2015.
Ekspertët theksojnë se fenomenet ekstreme të motit në Europë tashmë po bëhen më intensive dhe më vdekjeprurëse. Përmbytjet e vitit 2021 në lugina Ahr në Gjermani shkaktuan 134 viktima, ndërsa në vitin 2024 në rajonin e Valencia në Spanjë humbën jetën 229 persona.
Valët e të nxehtit gjatë verës shkaktojnë çdo vit dhjetëra mijëra vdekje në kontinent, ndërsa studimet tregojnë se një pjesë e madhe e tyre lidhen drejtpërdrejt me rritjen e temperaturave nga ndotja me lëndë djegëse fosile.
Po ashtu, zjarret pyjore të vitit të kaluar dogjën sipërfaqe rekord në Europë.
Ndërkohë, edhe Portugalia u nxit javën e kaluar të hartojë plane të reja përshtatjeje klimatike pasi u godit nga një seri stuhish të paprecedenta që shkaktuan të paktën 16 viktima dhe dëme rreth 775 milionë euro.
Raporti nënvizon se pa masa të shpejta dhe të koordinuara, rreziqet klimatike do të rriten me shpejtësi dhe në disa raste mund të arrijnë kufijtë e aftësisë së shoqërive për t’u përshtatur. / abcnews.al /
