Loading ...
Izraeli ka lejuar ekipet e Kryqit të Kuq dhe ekspertët egjiptianë të hyjnë në territorin e Gazës për të ndihmuar në kërkimet e trupave të pengjeve izraelite, ndërsa përpjekjet ndërkombëtare për të ruajtur armëpushimin vazhdojnë.
Një zëdhënës i qeverisë izraelite konfirmoi të dielën se ekipet ndërkombëtare janë lejuar të kalojnë kufirin ushtarak në Gaza, të njohur si “vija e verdhë”, e përcaktuar në kuadër të marrëveshjes së armëpushimit.
“Izraeli është i vetëdijshëm se Hamasi e di saktësisht se ku ndodhen trupat e pengjeve tanë. Nëse Hamasi do të përpiqej më shumë, do të ishte në gjendje t’i gjente dhe t’i kthente,” tha zëdhënësi.
Të shtunën, një ekip egjiptian mbërriti në Gaza me eskavatorë dhe buldozerë për të ndihmuar në kërkimet, në kuadër të përpjekjeve të ndërmjetësve ndërkombëtarë për të siguruar respektimin e armëpushimit. Ekipi po punon ngushtë me përfaqësuesit e Kryqit të Kuq.
Sipas të dhënave të fundit, trupat e 13 pengjeve izraelitë mbeten ende në territorin e Gazës. Udhëheqësi i Hamasit, Khalil al-Hayya, deklaroi se grupi ka zgjeruar zonat e kërkimit që prej së dielës në mëngjes.
Marrëveshja e armëpushimit, e ndërmjetësuar nga Shtetet e Bashkuara, parashikon që për çdo trup pengu të kthyer nga Hamasi, Izraeli të dorëzojë 15 trupa palestinezësh. Deri më tani, Izraeli ka kthyer 195 trupa palestinezësh, ndërsa Hamasi ka dorëzuar 15 trupa pengjesh.
Ndërkohë, Presidenti amerikan Donald Trump paralajmëroi se po ndjek nga afër zhvillimet dhe e cilësoi sjelljen e Hamasit “të papranueshme”.
“Disa nga trupat janë në zona të vështira për t’u arritur, por të tjerët mund të kthehen menjëherë — për arsye që nuk i kuptojmë, kjo nuk po ndodh,” shkroi Trump në rrjetin e tij social Truth Social.
“Të shohim çfarë do të ndodhë në 48 orët e ardhshme. Po e ndjek këtë situatë shumë nga afër,” shtoi ai.
Armëpushimi në Gaza mbetet i brishtë, dhe diplomatët ndërkombëtarë paralajmërojnë se vonesat në kthimin e trupave mund të rrezikojnë vazhdimësinë e tij.
/ abcnews.al /
