Loading ...
Presidenti i Ukrainës, Volodymyr Zelenskyy, ka lënë të hapur mundësinë që vendi i tij të sigurojë raketa me rreze të gjatë Tomahaëk nga Shtetet e Bashkuara, duke deklaruar se presidenti rus Vladimir Putin është i frikësuar nga ky skenar.
Në një intervistë ekskluzive, Zelenskyy foli për takimin dyorësh me presidentin amerikan Donald Trump, duke theksuar se kërkesa për raketat amerikane ishte në qendër të bisedës.
“Është mirë që Presidenti Trump nuk tha ‘jo’, por për momentin, nuk tha as ‘po’,” tha ai, duke lënë të kuptohet se ende ka shpresë për një vendim pozitiv.
Presidenti ukrainas nënvizoi se furnizimi me raketat Tomahawk do të kishte ndikim të madh në luftën kundër Rusisë.
“Mendoj se Putini ka frikë që Shtetet e Bashkuara do të na japin Tomahawk. Dhe mendoj se ai ka vërtet frikë që ne do t’i përdorim ato,” tha Zelenskyy.
Raketat Tomahawk kanë një rreze shumë më të gjatë sesa çdo sistem tjetër armësh në arsenalin ukrainas dhe do t’i jepnin Ukrainës një avantazh të ndjeshëm strategjik.
Megjithëse Trump nuk e përjashtoi mundësinë, ai nuk u shfaq entuziast për këtë ide, sidomos pasi pritet të takohet së shpejti me presidentin rus Vladimir Putin në Hungari. Trump kishte zhvilluar një bisedë telefonike me Putinin vetëm një ditë para takimit me Zelenskyy.
“SHBA nuk dëshiron përshkallëzim”
Pas takimit me Trump, Zelenskyy u tha gazetarëve:
“Sigurisht që folëm për raketat me rreze të gjatë. Por nuk dua të bëj deklarata për këtë.”
Ai shtoi: “Nuk flasim për këtë sepse… Shtetet e Bashkuara nuk e duan këtë përshkallëzim.”
Pavarësisht pasigurisë, Zelenskyy shpreh optimizëm. Vetë ideja që Ukraina mund të marrë Tomahaëk ka gjeneruar shqetësim në Moskë, duke ushtruar presion psikologjik mbi Kremlinin.
A do të vendosin SHBA për t’i dhënë Ukrainës këtë armë të fuqishme, mbetet ende për t’u parë. Por presidenti ukrainas vazhdon të balancojë me kujdes kërkesat e vendit të tij me shqetësimet diplomatike ndërkombëtare. / abcnews.al/
